UYEFA Rossiya yoshlar terma jamoalarini musobaqalarga qabul qilishni bekor qilgani yo‘q, shunchaki bugungi kunda Rossiya jamoalarining o‘yinlari uchun texnik yechim yo‘q.
Bu haqda OAV vakillariga Rossiya futbol ittifoqi bosh kotibi lavozimida ishlab kelayotgan Maksim Mitrofanov ma’lum qildi.
«Ijroiya qo‘mitasiga vaziyatni o‘rganish topshirildi, texnik yechim izlanmoqda. Nega ular nimadir bekor qilingani haqida ma’lumot tarqata boshlashdi, siz ulardan so‘rashingiz kerak», dedi Mitrofanov jurnalistlarga.
Eslatib o‘tamiz, UYEFA sentyabr oyi oxirida rossiyalik yoshlarni rasmiy turnirlarga qo‘yishini e’lon qilgan edi.
Keyinchalik, bir necha hafta o‘tgach, tashkilot ijroiya qo‘mitasi bu masalani kun tartibidan olib tashladi. Bu bir qator mamlakatlarning boykot qilishi fonida sodir bo‘ldi.
