Superliga 22-turida Bekobodning “Metallurg” jamoasi uy uchrashuvini Olmaliq shahrida “Buxoro”ga qarshi o‘tkazadi.

Mazkur jamoalar bugunga qadar kuchlilar safida 47 marta to‘qnash kelishgan. Uchrashuvlarning 21 tasida “Metallurg”, 19 tasida “Buxoro” g‘alaba qozongan. 7 ta o‘yinda esa durang qayd etilgan. Kiritilgan va o‘tkazib yuborilgan to‘plar farqi bekobodliklar foydasiga – 63:60. O‘zaro o‘yinlarda “Metallurg”ning eng yirik g‘alabasi – 3:0, 4:1, “Buxoro”ning eng yirik g‘alabasi esa 4:0 ni tashkil etadi.

Mazkur jamoalarning Bekobodda o‘tkazilgan o‘yinlarida “Metallurg” to‘liq ustunlikka ega bo‘lib kelmoqda. Mezbonlar 23 ta uchrashuvning 18 tasida zafar quchgan, 2 ta o‘yinda kuchlar teng kelgan, 3 bor esa mehmonlar g‘alaba nashidasini surgan.

Bekobodda o‘tgan so‘nggi beshta uchrashuv natijasi:

23.10.2020 «Metallurg» - «Buxoro» 0:0
29.03.2019 «Metallurg» - «Buxoro» 2:0
30.10.2018 «Metallurg» - «Buxoro» 1:0
29.04.2018 «Metallurg» - «Buxoro» 2:1
29.04.2017 «Metallurg» - «Buxoro» 1:2

“Buxoro” haqida

“Buxoro” futbol klubiga 1960 yilda asos solingan. Shu yillar mobaynida mazkur klub “Fakel”,  “Buxoro”,  “Nurafshon” nomlari bilan musobaqalarda qatnashdi.

Klubning milliy chempionatlarimizdagi eng yaxshi natijasi 1994 yilga to‘g‘ri keladi. O‘shanda “Buxoro” mamlakat vise-chempioni bo‘lgandi.  Jamoada eng ko‘p o‘yin o‘tkazgan futbolchi bu Yuriy Ageev, bitta mavsumda eng ko‘p to‘p kiritgan futbolchi esa Olim Tillayev (1994 yil, 19 ta gol).

“Buxoro”ning milliy chempionatlarimizdagi eng yirik hisobdaga g‘alabasi – 8:1 (1993 yil – “Shifokor”), 7:0 (1995 yil – “Politotdel”). Eng yirik mag‘lubiyati esa – 0:8 (2005 yil – “Paxtakor”).

“Buxoro” jamoasi kuchlilar safida bugungacha jami 848 ta o‘yin o‘tkazgan bo‘lib, shulardan 323 tasini o‘z foydasiga hal etgan, 150 o‘yinda durang natija qayd etilgan, 375 uchrashuvda esa imkoniyatni boy bergan. Kiritilgan va o‘tkazib yuborilgan to‘plar farqi – 1120:1292.