Суперлига 22-турида Бекободнинг “Металлург” жамоаси уй учрашувини Олмалиқ шаҳрида “Бухоро”га қарши ўтказади.

Мазкур жамоалар бугунга қадар кучлилар сафида 47 марта тўқнаш келишган. Учрашувларнинг 21 тасида “Металлург”, 19 тасида “Бухоро” ғалаба қозонган. 7 та ўйинда эса дуранг қайд этилган. Киритилган ва ўтказиб юборилган тўплар фарқи бекободликлар фойдасига – 63:60. Ўзаро ўйинларда “Металлург”нинг энг йирик ғалабаси – 3:0, 4:1, “Бухоро”нинг энг йирик ғалабаси эса 4:0 ни ташкил этади.

Мазкур жамоаларнинг Бекободда ўтказилган ўйинларида “Металлург” тўлиқ устунликка эга бўлиб келмоқда. Мезбонлар 23 та учрашувнинг 18 тасида зафар қучган, 2 та ўйинда кучлар тенг келган, 3 бор эса меҳмонлар ғалаба нашидасини сурган.

Бекободда ўтган сўнгги бешта учрашув натижаси:

23.10.2020 «Металлург» - «Бухоро» 0:0
29.03.2019 «Металлург» - «Бухоро» 2:0
30.10.2018 «Металлург» - «Бухоро» 1:0
29.04.2018 «Металлург» - «Бухоро» 2:1
29.04.2017 «Металлург» - «Бухоро» 1:2

“Бухоро” ҳақида

“Бухоро” футбол клубига 1960 йилда асос солинган. Шу йиллар мобайнида мазкур клуб “Факел”,  “Бухоро”,  “Нурафшон” номлари билан мусобақаларда қатнашди.

Клубнинг миллий чемпионатларимиздаги энг яхши натижаси 1994 йилга тўғри келади. Ўшанда “Бухоро” мамлакат вице-чемпиони бўлганди.  Жамоада энг кўп ўйин ўтказган футболчи бу Юрий Агеев, битта мавсумда энг кўп тўп киритган футболчи эса Олим Тиллаев (1994 йил, 19 та гол).

“Бухоро”нинг миллий чемпионатларимиздаги энг йирик ҳисобдага ғалабаси – 8:1 (1993 йил – “Шифокор”), 7:0 (1995 йил – “Политотдел”). Энг йирик мағлубияти эса – 0:8 (2005 йил – “Пахтакор”).

“Бухоро” жамоаси кучлилар сафида бугунгача жами 848 та ўйин ўтказган бўлиб, шулардан 323 тасини ўз фойдасига ҳал этган, 150 ўйинда дуранг натижа қайд этилган, 375 учрашувда эса имкониятни бой берган. Киритилган ва ўтказиб юборилган тўплар фарқи – 1120:1292.