Fransiya hukumati 2024 yilda Parijda bo‘lib o‘tadigan Olimpiya va Paralimpiya o‘yinlari xavfsizligini ta’minlash uchun harbiy kuchlardan foydalanish imkoniyatini ko‘rib chiqmoqda.
Parijdagi Olimpiya va Paralimpiya o‘yinlari xavfsizligini ta’minlash uchun mahalliy harbiylar shaklidagi qo‘shimcha kuchlar jalb etilishi mumkin. Fransiya sport vaziri Ameli Udea-Kasteraning aytishicha, bu variant Parij o‘yinlari paytida xususiy xavfsizlik xodimlarining yetishmasligini qoplash uchun yechim sifatida ko‘rib chiqiladi.
Avvalroq, Fransiyaning bir qancha yirik xususiy xavfsizlik kompaniyalari Olimpiya o‘yinlarida o‘z xizmatlarini taqdim etishdan bosh tortgan edi.
«Armiyadan foydalanish hozir kun tartibida emasligi sababli, biz hech bo‘lmaganda 2024 yil boshigacha jamoat xavfsizligini ta’minlash bo‘yicha eng muhim chora-tadbirlarni aniqlash bilan shug‘ullanamiz», dedi Udea-Kastera.
Hukumat va harbiy amaldorlar yaqin oylarda qaror qabul qilishga chaqirishdi. Biroq, Udea-Kasteraning qayd etishicha, bu jarayon uzoq davom etadi.
Bu harbiylarning Olimpiya o‘yinlari xavfsizligini ta’minlashga birinchi marta jalb etilishi emas. 2012 yilda Londonda bo‘lib o‘tgan yozgi o‘yinlarda xavfsizlikni ta’minlash uchun qo‘shimcha 13500 nafar harbiy xizmatchi safarbar etilgan. Bunga erishish uchun Britaniya hukumati xarajatlarni 438 million dollardan 859 million dollarga oshirdi.
26 iyul kuni Xalqaro olimpiya qo‘mitasi (XOQ) 2024 yilda Parijda bo‘lib o‘tadigan Olimpiada o‘yinlariga taklifnomalarni Rossiya, Belarus va Gvatemaladan tashqari 203 ta milliy olimpiya qo‘mitasiga yubordi.
Parijdagi Olimpiya o‘yinlari 2024 yilning 26 iyulidan 11 avgustiga qadar bo‘lib o‘tadi. O‘yinlarning tantanali ochilish marosimi Sena daryosida bo‘lib o‘tadi, u bo‘ylab milliy terma jamoalar Parij markazidan qayiqlarda suzib o‘tadi. 600 000 ga yaqin tomoshabin qirg‘oqlarni o‘rab olishi kutilmoqda. Shu kuni 45 ming huquq-tartibot idorasi xodimlari Fransiya poytaxti ko‘chalarida tartibni nazorat qiladi. Paralimpiya o‘yinlari 28 avgustdan 8 sentyabrgacha bo‘lib o‘tadi.
