Ayni kunlarda Yaponiyaning Tokio shahrida slalomda eshkak eshish bo‘yicha Osiyo chempionati bo‘lib o‘tmoqda.
Musobaqa yakkalik dasturlarida Parij-2024 Olimpiya o‘yinlariga yo‘llanmalar taqdim qilishi bilan yanada ahamiyatli. Hozirga kelib, jamoaviy dasturdagi bahslar yakunlandi. Unda ham kanoe, ham baydarka dasturlarida ishtirok etgan yigitlarimiz kumush medallarga ega chiqishdi.
Bugun yakkalik yo‘nalishida saralash bellashuvlari yakunlandi. Unda qatnashayotgan kanoechilarimiz Abubakr Bukanov, Alibek Temirgalev hamda Anvar Klevleev, shuningdek, slalomchilarimiz Barkamol Mirzahamdamov, Jonibek Temirgaliyev va Shahobiddin Boltaboyev yuqori natija qayd etib, yarim finalchilar qatoridan joy olishdi.
Endi ular ertaga final va Olimpiada yo‘llanmasi uchun kurashni davom ettirishadi. Qoidaga ko‘ra, faqatgina o‘z yo‘nalishida g‘olib bo‘lgan sportchilar Parij-2024 yo‘llanmasiga sazovor bo‘lishadi.
