Yevropaning nomdor klublari yuqori reytingga ega bo‘lgan futbolchilarni xarid qilish uchun banklarni ship-shiydam qilishga ham tayyorlar.
Masalan, «PSJ» 2017 yilda Neymarni o‘z tarkibiga jalb etish uchun jahon rekordiga teng mablag‘ sarfladi. Quyidagi material o‘z faoliyati davomida eng ko‘p mablag‘li kelishuvlarga sababchi bo‘lgan futbolchilar o‘nligiga bag‘ishlangan.
10. Zlatan Ibragimovich - 169,1 mln. yevro
«Ayaks», «Yuventus», «Barselona», «Milan», «Inter», «PSJ», «MYU»... Ibraning yetakchi o‘nlikdan joy olishi bejiz emas. Shvesiyalik afsona nafaqat top-klublar, balki milliy terma jamoada ham doimo yorqin o‘yin ko‘rsatgan va transfer bozorida serxaridor futbolchilar safidan joy olgan.
9. Anxel Di Mariya - 179 mln. yevro
2007 yilda 8 mln. yevro evaziga «Rosario Sentraldan «Benfika»ga o‘tgan Di Mariya ham noyob iqtidorini namoyish etib, 2010 yilda «Real»ni 33 mln. yevro sarflashga majbur etgandi. 4 yildan keyin u bilan tarkibni kuchaytirishga ahd qilgan «MYU» transfer bobida Britaniya rekordini o‘rnatdi. Argentina mundialining g‘olibi «PSJ» va «Yuventus»dagi faoliyatdan keyin, shu yilning yozida «Benfika»ga qaytdi.
7-8. Kilian Mbappe - 180 mln. yevro
Noyob iqtidor sohibi dastlabki transferning qiymati bilan reytingda yetakchi kvartetdan joy oldi. 2016|17 yillar mavsumida «PSJ»ga ijaraga berilgan «Monako» hujumchisi hozirga qadar 260ta bellashuvda 212ta gol urish bilan o‘ziga sarflangan xarajatni to‘la oqladi.
7-8. Antuan Grizmann - 180 mln. yevro
2014 yilda 30 mln. yevro evaziga «Real Sosyedad»ni «Atletiko»ga almashtirgan fransiyalik futbolchi Diyego Simeone rahbarligida eng sermahsul (257 o‘yin, 133 gol) hujumchilardan biriga aylandi. 2019 yilda «Barsa» uni 120 mln. yevroga xarid qildi. Lekin keyinchalik moliyaviy muammolar tufayli 2021 yil avgustida 20 mln. yevroga «Atletiko»ga sotib yubordi.
6. Filippe Koutinyo - 180,3 mln. yevro
Milanning «Inter»idan atigi 13 mln.ga xarid qilingan braziliyalik futbolchini «Liverpul» 5 yildan keyin 122 mln.ga «Barselona»ga pullagandi. Biroq terma jamoa a’zosi «Kamp-Nou»da ishonchni oqlay olmadi va ijara asosida «Bavariya»ga o‘tib ketdi. 2019|20 yillar mavsumida u myunxenliklar safida «Barsa»ga 2ta gol urgach, klub hamkorlikni to‘xtatdi. Shundan keyin Koutinyo «Aston Villa»ga yo‘l oldi. Lekin Unai Emeri unga yetarli ishonch bildirmadi. Natijada braziliyalik pleymeyker sentyabr boshida Qatar poytaxti Doxaga ko‘chib o‘tdi - «Al-Duxayl» klubi bilan bir yillik ijara shartnomasi tuzdi.
5. Alvaro Morata - 189 mln. yevro
Eng buyuk ko‘chmanchilardan biri maqomini olgan Morata nomdor grandlar tarkibida o‘z omadini sinab ko‘rdi. «Real» akademiyasida tahsil olgan hujumchini 2014 yilda «Yuventus» 20 «limon»ga xarid qilgandi. Oradan 2 yil o‘tgach, madridliklar uni kelishuv bandiga asosan qaytarib olishdi. Keyin Alvaro «Chelsi»da omadsizlik azobini totib ko‘rdi va 2020 yilda «Atletiko» uni 35 mln. evaziga o‘z safiga qo‘shib oldi. 2020|21 yillar mavsumini ijara asosida «Yuventus»da o‘tkazgan 30 yoshli hujumchi o‘tgan yil iyuniga qadar Turin klubida bo‘lib, keyin Ispaniyaga qaytdi.
4. Usmon Dembele - 220 mln. yevro
Yosh iqtidorlarni sinchkovlik bilan kuzatib yuradigan «Borussiya Dortmund» 2016 yilda Dembeleni «Renn»dan 13 mln. funtga sotib olgandi. Bir yildan keyin u bilan Neymar o‘rnini to‘ldirishga qaror qilgan «Barselona» 135,5 mln. funtdan voz kechdi. So‘nggi yillarda Usmon jarohatlar girdobida qolgan bo‘lsada, tez orada salomatligini tiklab oldi va yozda «PSJ»ga o‘tish evaziga 50 mln. yevro daromad keltirdi.
3. Krishtianu Ronaldu - 247 mln. yevro
Lissabonning «Sporting»idan 19 mln. yevro evaziga «MYU»ga o‘tgan Ronaldu dunyodagi eng yaxshi o‘yinchilar safiga ko‘tarildi. Keyin «Real» uni Ispaniyaga taklif etdi. Vinger esa barcha turnirlardagi 438 uchrashuvda 450ta gol urish bilan 94 mln. yevro behuda ketmaganligini isbotladi. Keyin Ronaldu La Liganing 2 karra chempioni va YECHLning 4 karra g‘olibi sifatida 2018 yilda «Yuventus»ga yo‘l oldi va «Blankos»ga 117 mln. daromad keltirdi. Keyin u 17 mln. yevro bahosida yana «MYU»ga, o‘tgan yil dekabrida esa Saudiyaga ravona bo‘ldi.
2. Neymar - 310 mln. yevro
«Santos»dagi faoliyatidan keyin Neymar 2013 yilda 88 mln. yevroli kelishuvga asosan «Barselona» a’zosiga aylandi va qisqa vaqt ichida Lionel Messi hamda Luis Suares bilan o‘ta sermahsul uchlikni tashkil etdi. 2017 yil yozida hujumchini o‘z safiga qo‘shib olishni maqsad qilgan «PSJ»ni 220 millionli baho ham to‘xtata olmadi. Jahon rekordi maqomidagi xarid butun Yevropani shok holatiga tushirdi, «Barsa»ni esa qarzga botirdi. Joriy mavsumda «Al-Hilol» sharafini himoya qilayotgan hujumchi uchun Saudiya klubi 90 mln. yevro taklif etgandi.
1. Romelu Lukaku - 339,2 mln. yevro
2011 yilda «Anderlext»dan 15 mln. yevroga «Chelsi»ga o‘tgan hujumchi 2014 yilda «ko‘klar»ga 20 mln. foyda keltirgan holda «Everton» safidan o‘rin oldi. 2017 yilda esa 84,7 mln. yevro evaziga «MYU» Romeluni o‘z safiga qo‘shib oldi va bir yildan keyin «Inter»ga 74 millionga sotib yubordi. 30 yoshli hujumchi milanliklar safida 95ta o‘yinda 64ta gol urib, unga tosh otayotgan tanqidchilar og‘zini yumdi. Shundan keyin «Chelsi» uni «Stemford Brij»ga qaytarish uchun 113 mln. sarfladi. Lekin Belgiya terma jamoasining hujumchisi avvalgi sermahsul o‘yinni ko‘rsata olmadi. Hozirda «Roma» safida ijara asosida o‘ynamoqda.
A.AHMEDOV tayyorladi
