Xabaringiz bor, «Navbahor» Osiyo Chempionlar ligasi (OCHL) guruh bosqichi bahslari doirasidagi 4-turdan o‘rin olgan bahsni safarda “Nassajiy Mazandaran” (Eron)ga qarshi o‘tkazadi.

Bo‘lajak raqibimiz bugun Eron oliy futbol ligasi sanaluvchi Fors ko‘rfazi Pro ligasining 8-turidan o‘rin olgan bahsda Tabrizda “Traktor” mehmoni bo‘lib, yirik – 0:3 hisobida mag‘lubiyatga uchradi.

Mazandaranliklar ayni paytda Fors ko‘rfazi Pro-ligasida 8 o‘yindan so‘ng, 1 g‘alaba, 3 durang, 4 mag‘lubiyatni qayd etgan holda, to‘plar nisbati 6-10 ko‘rinishida, 6 ochko jamg‘arib, 16 jamoa orasida 13-o‘rinni egallab turishibdi.

Umid qilamizki, ushbu yirik hisobdagi mag‘lubiyat “Nassaji Mazandaran” futbolchilariga tushkun kayfiyat taqdim etgan va bu bo‘lajak bahsda  “lochinlar”ga qo‘l kelib, vakillarimiz Erondan zafar bilan qaytishadi.

Eslatib o‘tamiz, “Nassajiy Mazandaran” – “Navbahor” o‘yini 6 noyabr kuni Eron poytaxti Tehron shahridagi  “Ozodi” stadionida mahalliy vaqt bilan soat 17:30 da, Toshkent vaqti bilan esa soat 19:00 da start oladi.

“Navbahor” PFK matbuot xizmati.