Xabaringiz bor, Osiyo Chempionlar Ligasi (OCHL)”D” guruhi, 4-turidan o‘rin olgan bahsda "Navbahor" safarda “Nassaji Mazandaran” (Eron)ga qarshi maydonga tushadi.

Mazkur bahs ertaga Toshkent vaqti bilan soat 19:00 da start oladi.

OCHL musobaqasi reglamentiga muvofiq, bo‘lajak bellashuv oldidan har ikki jamoaning bosh murabbiylari va bir nafardan futbolchilari ishtirokida bugun Tehron shahridagi ertangi o‘yin o‘tkaziladigan “Ozodiy” stadioni anjumanlar zalida bo‘lajak o‘yindan oldingi matbuot anjumani bo‘lib o‘tdi.

Unda “Navbahor” bosh murabbiyi Samvel Vyacheslavovich Babayan va “lochinlar”ning tajribali yarim himoyachisi Azimjon Ahmedovlar ishtirok etib, ertangi bahs borasida o‘z fikrlarini bildirishdi.

Samvel Babayan: – Assalomu alaykum! Barchaga xayrli kun! “Nassaji Mazandaran” adashmasam, o‘z tarixida ilk marotaba OCHLda ishtirok etayotganligi sababli, ushbu musobaqaga jiddiy tarzda tayyorgarlik ko‘rganligini e’tirof etish joiz. Bunga biz jamoa Namanganga tashrif buyurib, bizga qarshi maydonga tushganida ham guvoh bo‘ldik.

Shuningdek, fursatdan foydalanib, yuqori darajadagi tashkilotchilik uchun “Nassaji Mazandaran” vakillariga jamoamiz nomidan o‘z minnatdorchiligimni bildiraman.

Albatta, yana shuni ham ta’kidlash joizki, bizni Eron bilan ko‘p narsa bog‘lab turadi. Boisi, OCHLda xalqaro maydonlarda Eron sharafini himoya qilgan deyarli barcha klublar bilan o‘zaro ro‘baro‘ kelganmiz va o‘sha bahslar doimo yuqori saviyada, tomoshabop tarzda kechgan.

Ushbu mamlakatlar terma jamoalari hamda klublari bir-birlariga raqib bo‘lsa, bu har ikki yurt futboli rivojida muhim omil bo‘lib, xizmat qiladi. Bunday o‘yinlar orqali biz bir-birimizni to‘ldirib, rivojlanamiz" - dedi Samvel Babayan.

Azimjon Ahmedov: – Avvalo barchaga salom! Ertangi o‘yinda barcha imkoniyatlarimizni ishga solgan holda, muxlislarimizga quvonch ulashishga harakat qilamiz.