«Real»ning fransiyalik yarim himoyachisi Eduardo Kamavinga klub bilan 2029 yilgacha yangi shartnoma imzoladi. Bu haqda «Real Madrid» matbuot xizmati xabar berdi.

20 yoshli Kamavinga ikki yil avval Fransiyaning «Renn» klubidan «qirollik klubi» safiga kelib qo‘shilgandi.

Transfer summasi 40 million yevroni tashkil etdi. Debyut mavsumi yakunida Eduardo madridliklarga Ispaniya chempionati, mamlakat Superkubogi va Chempionlar ligasini yutishda yordam berdi.

Joriy mavsumda Eduardo Kamavinga Ispaniya La Ligasida Karlo Anchelotti jamoasi safida 12 ta o‘yinda maydonga tushdi va samarali harakatlarni qayd etmadi.

Madridning «Real» klubi ichki chempionatning 12-turidan so‘ng, peshqadam «Jirona»dan ikki ochko ortda qolib, turnir jadvalida ikkinchi o‘rinda bormoqda.