«Barselona» akademiyasida tahsil olgan yosh futbolchilar Yevropa Chempionlar Ligasini shunchaki, «yondirishmoqda».

Ular kechagina mashhur «La Masiya»da birga shug‘ullanishgandi, endi esa asosiy yevrokubok doirasidagi o‘yinlarning eng yaxshi futbolchisi maqomini olishmoqda.

Yevropada qaysi klubning akademiyasi eng yaxshisi? Bu savolga har tomonlama to‘g‘ri javob berishning iloji yo‘q. Lekin «Barselona» dargohi - «La Masiya»ning eng yaxshi akademiyalardan biri ekanligiga shubha yo‘q. Mana, yaqindagina «Barselona» bilan amaldagi shartnomasi muddatini uzaytirgan Fermin Lopes Chempionlar Ligasi 3-turidan o‘rin olgan «Shaxtyor»ga qarshi o‘yin (2:1)da jamoasi gollaridan biriga mualliflik qildi. Yakunda aynan 20 yoshli yarim himoyachini uchrashuvning eng yaxshi futbolchi sifatida e’tirof etishdi. Shu o‘rinda aytish kerak, «Barsa» va Fermin o‘rtasidagi yangi shartnoma 2027 yilgacha mo‘ljallangan bo‘lib, unda ko‘rsatilgan tovon puli miqdori 400 million yevroga teng.

CHL 3-turida yana bir «masiyachi» o‘yinning eng yaxshi futbolchisiga atalgan sovrin sohibiga aylandi. Gap hozirda «RB Leypsig»da to‘p surayotgan Xavi Simons haqida ketmoqda. Transfer huquqi bo‘yicha «PSJ»ga tegishli niderlandiyalik iqtidor «Srvena Zvezda» bilan bahsda gol urib, jamoasining 3:1 hisobida g‘alaba qozonishiga katta hissa qo‘shdi. E’tiborlisi, Fermin Lopes va Xavi Simons «La Masiya»dagi mashg‘ulotlarni bir vaqtda boshlashgan, qolaversa, ular tengdosh ham.