«Барселона» академиясида таҳсил олган ёш футболчилар Европа Чемпионлар Лигасини шунчаки, «ёндиришмоқда».

Улар кечагина машҳур «Ла Масия»да бирга шуғулланишганди, энди эса асосий еврокубок доирасидаги ўйинларнинг энг яхши футболчиси мақомини олишмоқда.

Европада қайси клубнинг академияси энг яхшиси? Бу саволга ҳар томонлама тўғри жавоб беришнинг иложи йўқ. Лекин «Барселона» даргоҳи - «Ла Масия»нинг энг яхши академиялардан бири эканлигига шубҳа йўқ. Мана, яқиндагина «Барселона» билан амалдаги шартномаси муддатини узайтирган Фермин Лопес Чемпионлар Лигаси 3-туридан ўрин олган «Шахтёр»га қарши ўйин (2:1)да жамоаси голларидан бирига муаллифлик қилди. Якунда айнан 20 ёшли ярим ҳимоячини учрашувнинг энг яхши футболчи сифатида эътироф этишди. Шу ўринда айтиш керак, «Барса» ва Фермин ўртасидаги янги шартнома 2027 йилгача мўлжалланган бўлиб, унда кўрсатилган товон пули миқдори 400 миллион еврога тенг.

ЧЛ 3-турида яна бир «масиячи» ўйиннинг энг яхши футболчисига аталган соврин соҳибига айланди. Гап ҳозирда «РБ Лейпциг»да тўп сураётган Хави Симонс ҳақида кетмоқда. Трансфер ҳуқуқи бўйича «ПСЖ»га тегишли нидерландиялик иқтидор «Црвена Звезда» билан баҳсда гол уриб, жамоасининг 3:1 ҳисобида ғалаба қозонишига катта ҳисса қўшди. Эътиборлиси, Фермин Лопес ва Хави Симонс «Ла Масия»даги машғулотларни бир вақтда бошлашган, қолаверса, улар тенгдош ҳам.