Kamondan otish bo‘yicha O‘zbekiston terma jamoasi a’zosi Ziyodaxon Abdusattorova Tailandda o‘tgan Parij-2024 litsenzion turnirida muvaffaqiyatli ishtirok etib, yurtimiz uchun tarixda mazkur sport turida birinchi Olimpiada yo‘llanmasini taqdim qildi.

Bu natija bilan Olimpiya o‘yinlarida O‘zbekiston delegasiyasi qatnashadigan sport turlarining geografiyasi yana bittaga ko‘payadigan bo‘ldi. Quyida Tailanddan tarixiy natija bilan qaytgan sportchimizning musobaqa taassurotlari bilan o‘rtoqlashamiz:

– Olimpiya o‘yinlarida ishtirok etadigan o‘zbekistonlik birinchi kamonchi bo‘lish taassurotlari qanday ekan?

«Olimpiadalarda kamondan otish sportida yurtimiz sharafini birinchi bo‘lib himoya qilish men uchun katta baxt. Buning hissiyotlarini so‘z bilan ta’riflab bera olmayapman. Bu sportimiz, qolaversa, O‘zbekiston kamondan otish federasiyasi uchun juda muhim va quvonchli voqelik bo‘ldi. Ishonamanki, bunday yirik natijalar mamlakatimizda kamondan otish sporti yanada rivojlanishiga oz bo‘lsa ham hissa qo‘shadi.

– Faoliyatingizdagi eng muhim o‘q uzish oldidan xayolingizdan nimalar o‘tdi?

Men uchun barcha uzilgan o‘qlar juda muhim. Tailandda hal qiluvchi palladagi o‘q ulardan biri. O‘q uzishdan oldin xayolim faqat qoq markazni nishonlash va qanday bo‘lmasin, 10 ochkolik aylanani poylash edi. Buni uddalay olganimdan xursandman.

– Minimum vazifa bajarildi. Endi oldinga qo‘yilgan vazifa qanday?

Oldimizda hali katta maqsadlar bor. Biz uchun lisenzion davr yakunlangani yo‘q. Kelasi yil jamoaviy yo‘nalishda ham Olimpiada yo‘llanmasini qo‘lga kiritish va Parijdan medal bilan qaytish uchun bor kuchimizni ishga solamiz.

– Olimpiadani qanday tasavvur qilyapsiz?

Parij-2024 Olimpiadasini ko‘tarinki ruhda o‘tadigan, yorqin xotiralarga to‘la, o‘z sportida dunyoning eng zo‘rlari bellashadigan, asosiysi, O‘zbekiston delegasiyasi uchun chiroyli g‘alabalarga boy musobaqa bo‘ladi, deya tasavvur qilyapman», – dedi sportchi.