«Bazel» matbuot xizmati klubning oktyabr oyidagi eng chiroyli golini aniqlagani yo‘q. Sababi juda oddiy va o‘ta og‘riqli.

Diqqat qiling, Shveysariya futboli bayroqdorlaridan biri sanalgan jamoa hisob bo‘yicha 10-oy davomida loaqal 1ta ham gol urmadi. Vaqtida mahalliy chempionat ishtirokchilarini gollar shodasi bilan «siylagan» «Bazel» hozir chinakam muammolar qarshisida qiynalmoqda. Jumladan, jamoa safida gol uradigan futbolchi topilmayapti. «Oktyabrda gol urilmadi, demak, oyning eng chiroyli goli ham yo‘q»,  - deya qisqa post qoldirildi Shveysariya klubining ijtimoiy tarmoqlardagi sahifasida. Vaholanki, «qizil-ko‘klar» oktyabr oyida 4ta o‘yin o‘tkazishdi.

Dahshatli seriya. «Bazel» 10-oy taqvimidagi 4ta o‘yinda ham «quruq» mag‘lubiyatni tan oldi: «Ula Lozanna» - 0:3, «Yang Boyz» - 0:3, «Servett» - 0:1 va «Lozanna» - 0:3. Qarang, 3ta yirik mag‘lubiyat. Jamoa Shveysariya Superligasi 12-turidan so‘ng atigi 5 ochkoga ega va turnir jadvalining so‘nggi - 12-qatorida bormoqda. Eslatish joiz, «Bazel» Shveysariyaning eng dongdor klublaridan biri hisoblanadi. «Qizil-ko‘klar» 1999 yildan doimiy ravishda yevrokuboklarda ishtirok etishganiyu, o‘tgan mavsum KL yarim finalida o‘ynashganini ham alohida aytish kerak.

Ijtimoiy tarmoqlarda esa klubning golsizligiga hazil­omuz munosabatlar ham bildirilmoqda. Misol uchun: «Yaxshiku, matbuot xizmati eng chiroyli golni aniqlash tashvishidan xoli». Lekin bunday yengillik matbuot kotiblariga aslo yoqmasligi ta­yin...