Mamlakat milliy chempionatining 25-turida "Metallurg" Toshkentda "Bunyodkor" mehmoni bo‘ladi. Mazkur jamoalar shu kunga qadar o‘zaro 35 marotaba kuch sinashishgan. “Qaldirg‘ochlar” 25 ta o‘yinda g‘alaba qozongan. 4 ta o‘yinda “Metallurg” zafar quchgan. 6 ta uchrashuvda esa durang qayd etilgan. To‘plar nisbati: 65:28.

Bu yilgi mavsumning birinchi davrasida “Metallurg” Bekobodda 1:1 hisobida durang o‘ynadi. 17-daqiqada Damir Temirov penaltidan hisobni ochgan bo‘lsa, 24-daqiqada Jasur Hakimov javob golini kiritgandi.

Toshkentda bo‘lib o‘tgan so‘nggi beshta uchrashuv:

10.05.2022 «Bunyodkor» - «Metallurg» 1:1
13.08.2021 «Bunyodkor» - «Metallurg» 2:0
17.08.2020 «Bunyodkor» - «Metallurg» 2:0
18.08.2019 «Bunyodkor» - «Metallurg» 1:0
24.11.2018 «Bunyodkor» - «Metallurg» 1:0

“Bunyodkor” haqida

“Bunyodkor” mamlakatimizning yosh jamoalaridan biri. Ammo qisqa fursatda jamoa o‘zining shonli tarixini yaratdi. Bir yil ichida birinchi ligadan oliy ligaga yo‘l oldi. Kuchlilar safida esa doimiy ravishda yetakchilar qatoridan o‘rin egallab kelayapti. “Qaldirg‘ochlar” 5 marta O‘zbekiston chempioni, 2 marta vise-chempion, 2 marta bronza medali sovrindori, 4 marta O‘zbekiston kubogi sohibi va 5 karra finalchisi, Superkubogi sohibi bo‘ldi.

“Bunyodkor” stadioni mamlakatimizning eng muhtasham futbol majmuasi sanaladi. 2012 yilning 28 sentyabr sanasida qurib, foydalanishga topshirilgan,  “Bunyodkor”  stadioni  o‘z bag‘riga 34000 tomoshabinni sig‘diradi.

“Bunyodkor” bugungacha oliy liga bahslarida 470 ta uchrashuv o‘tkazgan. Shulardan 285 tasida g‘alaba qozongan, 101 tasida durang o‘ynagan, 84 tasida mag‘lubiyatga uchragan. Kiritilgan va o‘tkazib yuborilgan to‘plar farqi – 824:381. Jamoaning kuchlilar safidagi eng yirik g‘alabasi – 7:0 (“Sho‘rtan”, 2008 yil), eng yirik mag‘lubiyati – 0:5 (“Paxtakor”, 2020 yil).