«Real»ning fitnes-murabbiyi NASA tadqiqot markazi bilan hamkorlikda ish boshlamoqda.

Endilikda uning mashg‘ulot o‘tash usullaridan kosmonavtlarni tayyorlashda ham foydalanishadi. Ha, gap jismoniy tayyorgarlik bo‘yicha mashhur mutaxassis Antonio Pintus haqida ketmoqda. Relevo xabariga qaraganda, «Real» futbolchilarini og‘ir mashg‘ulotlar orqali tonusda ushlab turishi bilan tanilgan murabbiy yaqinda NASA tashkilotining Xyustonda joylashgan shtab-kvartirasiga tashrif buyurdi.

Ma’lum bo‘lishicha, italiyalik «berahm» murabbiydan astronavtlarni kosmik missiya­ga yaxshiroq tayyorlashda yaqindan yordam berish so‘ralgan. Pintus endi kosmik agentlik bilan ma’lumotlar va tajriba almashib ishlaydi. Oddiy aytganda, NASA mutaxassislari Pintus «Madrid»da yo‘lga qo‘ygan ba’zi texnik mashg‘ulotlarni kosmonavtlarni tayyorlash jarayonida sinab ko‘rmoqchilar. O‘z navbatida, murabbiy NASA agentligida mavjud usullarni yaqindan o‘rganib chiqdi va kelajakda ulardan ayrimlarini «Real Madrid» hayotiga olib kirish niyatida.

Ta’kidlanishicha, NASA rahbariyati 61 yoshli mutaxassis bilan ilk marta yozda aloqa bog‘lagan. Pintus o‘shanda «Madrid» bilan AQSH turnesiga chiqqan edi. Italiyalik murabbiy ilg‘or mashg‘ulotlar to‘plamini yo‘lga qo‘ygani bilan dunyo miqyosida e’tirofga erishganini alohida aytish kerak. Misol uchun, u futbolchilarda chidamlilikni oshirish uchun ularni maxsus nafas olish niqobida shug‘ullantiradi.