Kanadaning Toronto shahrida shaxmat bo‘yicha Champions Chess Tour—2023 turnirida hal qiluvchi bahslar boshlandi.

Umumiy mukofot jamg‘armasi 500 000 dollarni tashkil etuvchi ushbu musobaqada kecha yarim finalning dastlabki janglari bo‘lib o‘tdi. Reglamentga ko‘ra, yarim finalning ilk kunida tomonlar 4 tadan partiya o‘tkazishdi. Agar durang qayd etilsa, qo‘shimcha "armageddon" tay-brey o‘yin o‘tkaziladi.

Nodirbek Abdusattorov final yo‘llanmasi uchun AQSHlik So Uesliga qarshi 4ta jang o‘tkazdi. Birinchi partiyada durang vaziyatda hamyurtimiz g‘alaba uchun harakat qilib, tavakkalga qo‘l urdi. Ammo vaqt qisqaligi uchun Nodirbek xatoga yo‘l qo‘ydi va partiyani boy berdi.

Abdusattorov ikkinchi partiyada oq donalarda tajovuzkor o‘yin ko‘rsatgan bo‘lsa, So durang uchun harakat qildi. Vatandoshimiz 36-daqiqaga kelib g‘alabani rasmiylashtirdi. Natijada hisob tenglashdi.

Uchinchi partiyada o‘yin teng kechdi. Endshpilda esa Nodirbek raqibning ikki piyodasini yutib oldi va Ueslini xato qilishga majbur edi. Natijada g‘alaba qozonib, 2-1 hisobida oldinga o‘tib oldi.

Oxirgi partiyada o‘zbek grossmeysterini durang ham qanoatlantirar edi. 34-yurishga kelib yurishlar 3 marta takrorlangach, tomonlar durangga imzo chekishdi.

Oqibatda Abdusattorov birinchi setni 2,5 - 1,5 hisobida o‘z foydasiga hal qildi. Bugun ham xuddi shunday tartibda ikkinchi set bahslar o‘tkaziladi.

Ikkinchi yarim final esa Fabiano Karuana va Magnus Karlsen o‘rtasida kechdi. 4 partiyadan so‘ng 2:2 hisobi qayd etilgan bo‘lsa, "armageddon"da norvegiyalik shaxmatchining qo‘li baland keldi.