Samarqandda bo‘lib o‘tayotgan shaxmat bo‘yicha jahon chempionatida kecha mojaro yuz berdi.

Blis bahslarining 11-turida rossiyalik ikki sportchi — Daniil Dubov va Yan Nepomnyashchiy o‘zaro to‘qnash kelishdi. Tomonlar 13-yurishda durangga kelishishdi (shaxmatda, agar tomonlar vaziyatni teng deya hisoblashsa, o‘zaro kelishgan holda durang qayd etilishi mumkin).

Ammo hakamlar vaziyatni tahlil qilishdi. Musobaqa bosh hakami Ivan Siroviy esa har ikki sportchiga mag‘lubiyat yozish haqida qaror chiqardi (durang uchun ularga berilgan 0,5 ochko bekor qilindi).

Shundan so‘ng shaxmatchilar appellyasiya berishdi. Appellyasiya komissiyasining uchala a’zosi ham bosh hakamning qarorini o‘z kuchida qoldirish haqida qaror chiqardi.

Quyida o‘yinni videosini tomosha qilishingiz mumkin: shaxmatchilar faqat ikkita ot bilan bir xil o‘ynashgan. Otlar maydonga chiqarildi va taxta bo‘ylab aylantirib, yana o‘z o‘rniga joylab qo‘yildi. 13-yurishdan keyin durangga kelishishdi.

Shaxmat qoidalarining 1-modda 11-qoidasida "Sportchilar shaxmat o‘yinining reputasiyasiga salbiy ta’sir ko‘rsatadigan hech qanday xatti-harakatlarni qilishi kerak emas", deb yozib qo‘yilgan.

Daniil Dubov o‘zining bu ishini musobaqa tashkilotchilari va hakamlariga norozilik ramzi ekani bilan izohladi:

"Odatda bunday partiyalar musobaqa tashkilotchilari harakati yoki hakamlar ishiga norozilik sifatida qilinadi.

Artemyevga qarshi o‘yinimda (8-tur) Vladislav bir yarim daqiqaga kechikdi (beyjiki yo‘qligi uchun uni o‘yin zaliga kiritishmagan). Bunday ustunlik bilan o‘ynashni men istamadim. Bir yarim daqiqa kutib, "bullet" o‘ynashni ham xohlamadim.

Men 2013 yildan beri o‘tkazib kelanayotgan barcha jahon chempionatlarida ishtirok etib kelyapman, faqat 2017 yilga turnirda qatnashmadim. Shuni aytishim mumkinki, bugungi kun, nazarimda, hakamlar ishi va tashkilotchilik borasida men ishtirok etgan turnirlar orasida eng yomoni bo‘ldi. Yan bilan partiyamiz debyutiga bu narsa o‘z ta’sirini o‘tkazdi".