Kecha "terma jamoa hujum chizig‘ida kimni ko‘rishni xohlardingiz?" deb o‘tkazgan so‘rovnomamizda Igor Sergeev va Oston Urunov deyarli bir xil natija qayd etishdi.  Durang desa ham bo‘ladi.

Keling, hujumchilarimizni ustun tomonlarini sanab o‘tishga harakat qilamiz.

Igor Sergeev

Igorning eng katta ustunlik tomoni bu uning juda katta hajmda ish bajarishi bo‘lsa kerak. Doim harakatda. To‘p raqibda bo‘lganda himoyachilarga bosim qilish, orqaroqqa tushib to‘p uchun kurashish,  zonalarni yopish. Yana bir ustunligi to‘p uchun doim kurashadi. To‘pni ushlab turishi boshqa hujumchilarimizga qaraganda nisbatan yaxshiroq. Yana bir tomoni atletik tarafdan baquvvat. Bu himoyachilar bilan kurashda foyda beradi. Bosh bilan ham yaxshiroq o‘ynaydi.

Oston O‘runov

Ostonning eng katta ustun tomoni bu tezlik va dribling bo‘lsa kerak.  Qo‘shimchasiga tezlikda ham dribling ishlatib qochib keta oladi.

Oston asli markaziy hujumchi emas. Lekin¸ Shomurodov jarohat olganidan so‘ng markazda foydalanilsa kerak. Yoki vaziyatga qarab qanotda ham o‘ynayveradi.

Shuningdek, qanotdan qochib ketib sheriklariga to‘p yetkazib berishi ham joyida. Ijrochilik mahorati ham joyida. Qiyin vaziyatda to‘pni qanday darvozaga yo‘llashni yoki yetkazib berishni yaxshi biladi. Qo‘shimchasiga baquvvat.

Terma jamoamiz qarshi hujumda o‘ynasa Katanes aynan undan foydalansa kerak.

Bobur Abduxoliqov

Boburning oxirgi payt eng katta ustun tomoni bu yarimta vaziyatdan ham gol ura olishi bo‘lyapti. Unga yarimta vaziyatga imkon bering, o‘sha vaziyatdan gol urib keta oladi. Meksika bilan o‘yinga o‘xshab o‘yin davomida unchalik ko‘rinmay turib bitta vaziyatdan gol urib keta olishi mumkin. Bu qolgan sheriklariga nisbatan uning ustunroq tomoni.

Gol ura olish, golni sezish qobiliyati juda yuqori. Jarima maydoni ichida hujumchilarga xos qayerda turish kerakligini, to‘p qayerga kelishi mumkinligini seza oladi.

Tezligi ham joyida. Gavda va bo‘y jihatidan sheriklariga yutqazgani uchun ko‘pchilik uni imkoniyati past baholagan ko‘rinadi. Nimagadir Katanes undan yashirin qurol sifatida foydalansa kerak deb o‘ylayman. Ayniqsa, gol ura olmayatgan vaziyatlarda.

O‘yinchilarni kamchiliklarini sanab o‘tirmadim. Turnirdan oldin negativlarni ortga surib, terma jamoamizni qo‘llab quvvatlaymiz.

Ravshan Salimov.