Olmaotaning “Qayrat” klubi O‘zbekiston milliy terma jamoasining 22 yoshli himoyachisi Ibrohimxalil Yo‘ldoshev bilan shartnoma imzolaganini e’lon qildi.

Futbolchimiz 2024 yilning oxirigacha sotib olish huquqi bilan Olmaota klubiga ijaraga o‘tdi.

Yo‘ldoshev “Paxtakor” tarbiyalanuvchisi. 2019 yilda toshkentliklar tarkibida O‘zbekiston chempioni bo‘lgan, 2021 yilda esa mamlakat Superkubogini qo‘lga kiritgan. Qolaversa, himoyachi "Bunyodkor"da ham o‘ynagan.

2021 yilning yozida Ibroximxalil Rossiyaning “Nijniy Novgorod” klubiga o‘tdi va shu kungacha o‘sha yerda o‘ynadi. Umuman olganda, u "Nijniy Novgorod" uchun 63 ta o‘yin o‘tkazib, 3 ta gol urdi va 5 ta golli uzatmani amalga oshirdi.

Yo‘ldoshev 22 yoshida O‘zbekiston terma jamoasi libosida 16 ta o‘yin o‘tkazib, 1 ta gol urishga muvaffaq bo‘lgan. 2023 yilning kuzida esa O‘zbekiston olimpiya terma jamoasi tarkibida barcha o‘yinlarda qatnashib, Osiyo o‘yinlarining bronza medali sovrindori bo‘ldi.