Олмаотанинг “Қайрат” клуби Ўзбекистон миллий терма жамоасининг 22 ёшли ҳимоячиси Иброҳимхалил Йўлдошев билан шартнома имзолаганини эълон қилди.

Футболчимиз 2024 йилнинг охиригача сотиб олиш ҳуқуқи билан Олмаота клубига ижарага ўтди.

Йўлдошев “Пахтакор” тарбияланувчиси. 2019 йилда тошкентликлар таркибида Ўзбекистон чемпиони бўлган, 2021 йилда эса мамлакат Суперкубогини қўлга киритган. Қолаверса, ҳимоячи "Бунёдкор"да ҳам ўйнаган.

2021 йилнинг ёзида Иброхимхалил Россиянинг “Нижний Новгород” клубига ўтди ва шу кунгача ўша ерда ўйнади. Умуман олганда, у "Нижний Новгород" учун 63 та ўйин ўтказиб, 3 та гол урди ва 5 та голли узатмани амалга оширди.

Йўлдошев 22 ёшида Ўзбекистон терма жамоаси либосида 16 та ўйин ўтказиб, 1 та гол уришга муваффақ бўлган. 2023 йилнинг кузида эса Ўзбекистон олимпия терма жамоаси таркибида барча ўйинларда қатнашиб, Осиё ўйинларининг бронза медали совриндори бўлди.