Karim Benzema Saudiya Arabistoni chempionatini tark etish niyatida emas.
Eslatib o‘tamiz, avvalroq hujumchi bosh murabbiy qarori bilan "Al-Ittihod" yig‘inidan chetlashtirilgan edi. Fransiyalik futbolchi klubni tark etmoqchi ekani xabar qilingandi.
Benzemaga yaqin bo‘lgan manbalar uning jamoani tark etish niyatida emasligini va tez orada yana o‘z safiga qo‘shilishini ta’kidlamoqda.
“U [Mavrikiyda] qolib ketdi, chunki dovul tufayli barcha aeroportlar yopilgan. Lekin hammasi joyida, u Saudiya Arabistonida o‘zini juda yaxshi his qilmoqda va tez orada mashg‘ulotlarni davom ettiradi", - dedi Benzemaning yaqinlaridan biri.
Jurnalistlar “Al-Ittihod” bosh murabbiyi Marselo Galyardo bilan bog‘lana olishmadi, biroq uning shtab a’zosi Benzema bilan bog‘liq vaziyat jiddiy muammo emasligini aytdi.
Saudiya Arabistoni chempionati 7 fevral kuni davom ettiriladi. Benzema o‘sha kungacha vaziyatni tartibga solishga ulgurishi kutilmoqda.