Карим Бензема Саудия Арабистони чемпионатини тарк этиш ниятида эмас.
Эслатиб ўтамиз, аввалроқ ҳужумчи бош мураббий қарори билан "Ал-Иттиҳод" йиғинидан четлаштирилган эди. Франциялик футболчи клубни тарк этмоқчи экани хабар қилинганди.
Бенземага яқин бўлган манбалар унинг жамоани тарк этиш ниятида эмаслигини ва тез орада яна ўз сафига қўшилишини таъкидламоқда.
“У [Маврикийда] қолиб кетди, чунки довул туфайли барча аэропортлар ёпилган. Лекин ҳаммаси жойида, у Саудия Арабистонида ўзини жуда яхши ҳис қилмоқда ва тез орада машғулотларни давом эттиради", - деди Бенземанинг яқинларидан бири.
Журналистлар “Ал-Иттиҳод” бош мураббийи Марсело Гальярдо билан боғлана олишмади, бироқ унинг штаб аъзоси Бензема билан боғлиқ вазият жиддий муаммо эмаслигини айтди.
Саудия Арабистони чемпионати 7 февраль куни давом эттирилади. Бензема ўша кунгача вазиятни тартибга солишга улгуриши кутилмоқда.