Pep Gvardiola UYEFA prezidenti Aleksander Cheferinga javob qaytardi.
Avvalroq, Cheferin "Manchester Siti" moliyaviy feyr-pley qoidalari buzganlikda aybdor ekanligiga ishonch bildirgan edi. UYEFA rahbari "Manchester Siti"ning 2020 yilgi Chempionlar ligasidan chetlatilgani va bu qarorning CAS tomonidan bekor qilinishi haqida gapirar ekan, "Biz haq bo‘lganimizni bilamiz. Ammo biz jiddiy demokratiyada sud qarorini hurmat qilishimiz kerak".
"U advokat sifatida va UYEFA prezidenti sifatida kutishi va keyin xohlaganini qilishi kerak. U buni hurmat qilishi va kutishi kerak. Uning UYEFAda qiladigan ishlari ko‘p. Advokat prosedurani hurmat qilishi va o‘zimizni himoya qilishga haqqimiz borligini tushunishi kerak", — dedi "Manchester Siti" ustozi.
2020 yilning fevralida UYEFA "Manchester Siti"ni ikki yilga yevrokuboklardan chetlashtirgan va moliyaviy feyr-pley qoidalarini buzgani uchun klubga 30 million yevro miqdorida jarima solgandi. Sport arbitraj sudi (CAS) klubning apellyasiyasini qanoatlantirdi va u Chempionlar ligasida o‘ynashda davom etdi.
Premyer-liga hozirda "Manchester Siti"dagi ehtimoliy moliyaviy qoidabuzarliklarni tekshirmoqda.
