YECHL guruh bosqichining so‘nggi turida «Union» klubining chexiyalik yarim himoyachisi Aleks Kral 85-daqiqada «Real» darvozasini ishg‘ol etib, muvozanatni tiklagandi va...

Va stadiondagi 70 000dan ortiq muxlislarda nufuzli turnirdagi ilk g‘alabaga umid uyg‘ongandi. Biroq Dani Sebalyosning 89-daqiqadagi goli mehmonlar g‘alabasini ta’minladi.

«Olimpiashtadion»ni to‘ldirib o‘tirgan muxlislar sevimli jamoalari 6ta o‘yinda atigi 2 ochko olganidan ranjigan bo‘lsalarda, o‘yinchilar va murabbiylarni tanqid qilmadilar. To‘g‘ri, yevrokuboklar turnirini barvaqt tark etish - futbolning bir bo‘lagi. Lekin u avvalgi mavsumni 4-o‘rinda yakunlagan va yanada yuksak marralarni ko‘zlayotgan «Union»da qandaydir g‘ayritabiiy o‘zgarishlar yuz berganidan dalolat beradi. Atigi 6 oy avval shiddatli parvozning, jumladan, bosh murabbiy Urs Fisherning to‘satdan g‘oyib bo‘lishi o‘ta ajablanarli hodisa edi. Biroq startdagi 14 o‘yinli g‘alabasiz seriya, qatorasiga 12ta mag‘lubiyat murabbiyning iste’fosi tashqari, jamoa kelajagini ham shubha ostida qoldirgandi.

«Union»ning 2-divizion vakili maqomidan Bundesliganing qudratli jamoasiga aylanishi Fisher bosh qahramon rolini o‘ynagandi. Shveysariya­lik mutaxassis Berlin klubiga aqlli pressing va vertikal hujumga asoslangan o‘ziga xos uslubni singdirgandi. Lekin sentyabrda bo‘y ko‘rsata boshlagan xavotirli pasayish davrida murabbiy jamoaga o‘ziga bo‘lgan ishonchni qaytara olmaydigandek tuyuldi. Ayni pallada Robin Gozens va Leonardo Bonuchchining transferlari «Union»ning ishtahasiga moy quydi. Endi jamoa 5 yil avvalgi autsayderga umuman o‘xshamasdi. Qishda nemis matbuoti sahifalari «Union»ning Iskoga xaridor bo‘lganligi haqidagi xabarlarga to‘lib ketdi. «Real»ning sobiq o‘yinchisi hatto Berlinga uchib kelgan bo‘lsada, tomonlar bir to‘xtamga kela olishmadi. Shunga qaramasdan, «Union» taniqli o‘yinchilar ortidan quvishni davom ettirdi, Bonuchchi, Gozens kabi bir qator o‘yinchilarning kelishi uni 5 yil ichida izzattalab jamoa­lar safiga olib chiqdi. Shu tariqa sharqiy Berlin klubi yangi davrga qadam qo‘ydi.

Biroq yangi bosqichda jamoani navbatdagi yorqin parvoz emas, 2018 yilda boshlangan Fisher davrining ayanchli intihosi qarshi oldi. Noyabr­da murabbiy jamoani tark etgach, ma’lum muddat Raulga umid bog‘lashdi. Biroq «Real» afsonasi yoshlar jamoasida ishlashni afzal ko‘rdi. Berlinliklar esa Nenad Byelisa nomzodiga qiziqishdi.

52 yoshli xorvatiyalik mutaxassis nemis futboli uchun begona emas: 2000-yillarda u 3 mavsum «Kayzerslautern»da to‘p surdi. Murabbiylik faoliyatini esa «Volfsberg» klubida boshlab, ke­yin «Austriya»ni boshqardi. Keyinchalik murabbiy Italiyada «Spesiya», Polshada «Lex» klublarida ishladi. Shundan keyin o‘z vataniga qaytib, Xorvatiyaning eng nufuzli klubi - Zagreb «Dinamo»sini o‘z tasarrufiga oldi. Byelisa poytaxt klubi bilan 2 marta shohsupani zabt etdi. Bundan tashqari, uning «Dinamo»si xalqaro arenada ham risoladagidek o‘yin ko‘rsatdi. Keyinchalik murabbiy Turkiyaning «Trabzonspor» klubini qabul qildi. Lekin 6 oydan keyin jamoani tark etdi.

Byelisa taniqli taktik murabbiylari toifasidan emas, lekin o‘ziga xos uslubdagi malakasi bilan nom qozongan. Xorvatiyalik mutaxassis o‘z shogirdlarining o‘yinga bo‘lgan qiziqishlarini oshirib, yo‘qotib qo‘ygan ishonchlarini qaytara oladi. Fisher faoliyatining oxirgi kunlarida «Union»dan nafaqat taktika bobidagi muammolar, balki futbolchilardagi umidsizlik illatiga qarshi kurashish ham talab etilardi. Hatto jamoaning eng sadoqatli muxlislari ham suyukli jamoalariga turtki bera olmadilar. «Union» natija bobida ham, o‘yin saviyasi bo‘yicha ham o‘ta ayanchli holatga tushib qoldi.

Byelisa jamoa boshqaruvini o‘z izmiga olganidan keyin, undan shogirdlarini «Braga»ga qarshi YECHL guruh bosqichidagi bellashuvga tayyorlash talab etilardi. Boz ustiga, «Union»ning «Bavariya»ga qarshi ichki chempionatdagi uchrashuvi kuchli qor yog‘ishi munosabati bilan kechiktirilgandi. Portugaliya klubi bilan bo‘lgan o‘yinda yangi murabbiy o‘tmishdoshining 3-5-2 taktik sxemasidan voz kechib, 4 nafar himoyachini maydonga tushirdi. Bonuchchi esa zaxira o‘rindig‘idan joy oldi. Tarkibda sezilarli o‘zgarishlar amalga oshirilganiga qaramasdan, jamoa mazkur o‘yinda g‘ayrat,shijoat bilan to‘p surdi, deya olmaymiz. Hatto portugaliyaliklar himoyachisi Siku Niakate qizil kartochka olib maydonni tark etgan, Gozens esa gol urib, «Union»ni hisobda oldinga olib chiqqan bo‘lsada, jamoa ruhiyati ko‘tarilmadi va tanaffusdan keyin jamoa o‘z darvozasidan to‘p olib chiqishga majbur bo‘ldi.

Cho‘ka boshlagan jamoani g‘arq bo‘lishdan saqlab qola oladigan xaloskor aynan Byelisa bo‘lishi mumkinligi xususidagi alomat «Union» «Braga»ga qarshi uchrashuvdan qaytib kelganidan bir necha kun keyin yuz berdi. O‘shanda jamoa barcha turnirlardagi 16ta mag‘lubiyatdan keyin ilk bor Menxengladbaxning «Borussiya»sini 3:1 hisobida mahv etgandi. Mazkur uchrashuv hujumchi Benedikt Xollerbax uchun ham muhim ahamiyat kasb etgan, «Visbaden»­dan oliy divizionga ko‘tarilgan futbolchi ilk golini nishonlagandi.

«Real» bilan jangovar durangga imzo chekish jamoaga ko‘tarinki kayfiyatni hadya etishi aniq edi. Biroq Madrid grandidan qabul qilingan mag‘lubiyatdan keyin, jamoa bundesliga doirasida «Boxum»ga ham yirik hisobdagi g‘alabani sovg‘a qildi. To‘g‘ri, 16-turda Xollerbax «Kyoln» darvozasiga ham gol urdi, «Union» 2:0 hisobida g‘alaba qozondi va autsayderlar guruhini tark etdi. Biroq berlinliklar mavsumning shu zaylda o‘tishini xayollariga ham keltirishmagandi. Muxlislar va klub mutasaddilari Fisherdan uzoq va samarali faoliyatni kutishgandi. Afsuski, «Union»ning pastga sho‘ng‘ishi elitaga ko‘tarilishga nisbatan juda tez va og‘riqli bo‘ldi. Endi Byelisa oldida tezroq ochkolarni jamg‘arish va xavfli hududdan imkon qadar uzoqlashish vazifasi turibdi.

R.IBROHIMOV tayyorladi