«Andijon» klubining Antaliya shahrida davom etayotgan o‘quv-mashg‘ulot yig‘inlari davomida bir qator o‘rtoqlik uchrashuvlari ham o‘tkazilayotganidan xabardorsiz. Klubning har bir a’zosi bor kuchini safralagan holda mashg‘ulotlarda astoydil mehnat qilishyapti. Jumladan, jamoa sardori Ildar Mamatkazin ham. Unda yetakchilarga xos xususiyat mavjud. Shu bois ham u har qanday o‘yinda o‘zini ayamasdan, jonini berib o‘ynaydi. Kuni kecha esa Slovakiyaning «Belusha» jamoasiga qarshi bellashuvda u biroz jarohat oldi.

– Ildar jarohatingiz haqida so‘ramoqchiman. Jiddiy emasmi?
— Jiddiy emas. Har doimgidek bo‘lib turadigan holat. Ozgina qoshim yorildi, shu xolos. Hammasi joyida.

— Slovakiya klubiga qarshi o‘yindan qanday taassurot oldingiz?
— O‘yin teng kurashlar ostida o‘tdi. Ularda ham, bizda ham imkoniyatlar bo‘ldi. Durangga mos uchrashuv bo‘ldi. Jismoniy yuklamalar ostida o‘ynayapmiz. Asosiysi, natija emas. Turli taktik sxemalar shu o‘yinlar orqali sinab ko‘rilyapti. Raqib ham o‘ziga yarasha shakllangan. Taktik, texnik va jangovar jihatlarga ega. Bu jamoa uchinchi divizion vakili bo‘lishiga qaramasdan ancha yaxshi taassurot qoldirdi. Yevropa futbolining havosi borligi sezilib turibdi.

— Antaliyadagi o‘quv-mashg‘ulot yig‘ini hakida nima degan bo‘lardingiz?
— Antaliyadagi yig‘inimiz juda yaxshi o‘tyapti. Asosan jismoniy tayyorgarlik va o‘yin amaliyotiga ega bo‘lyapmiz. Har xil taktik sxemalarni o‘yinlar orqali sinovdan o‘tkazyapmiz. Sharoitlarga keladigan bo‘lsak, barchasi a’lo darajada. Jamoa ichidagi muhit ham juda yaxshi. Futbolchilar mashg‘ulotlarda tinimsiz ravishda o‘zlarini ayamasdan bor kuchini sarflayaptilar.

— «Andijon» chempionatning ilk turini safarda OKMKga qarshi o‘yin bilan boshlaydi. Bu borada fikringiz qanday?
— O‘tgan yili ham bizga yetakchi jamoalardan biri to‘g‘ri kelgan. Bu yil ham yana yetakchilardan biri bilan o‘ynaymiz. O‘tgan yili isbotladikki, bemalol favoritlarga qarshi o‘ynay olamiz. Shuning uchun kim ro‘baro bo‘lishidan qat’iy nazar asosiy maqsadimiz faqat g‘alaba! O‘tgan yili yetakchilarga qarshi o‘ynab o‘zimizni ko‘rsata olganimiz bois jamoamizda g‘olibona ruh yaxshi shakllangan. O‘zimizga bo‘lgan ishonch ham yuqori.

— Shuningdek, «Andijon»ning Antaliyadagi sparring-raqiblari xususida nima degan bo‘lardingiz?
— Janubiy Koreya terma jamoasi yoqdi. Tezkor va hujumkor. Jismonan ham kuchli futbolchilardan iboratligi ko‘rindi. SSKAga qarshi uchrashuvda ham raqib yuqori darajadagi jamoa ekanligi bilinib turdi. Umuman olganda, o‘ynayotgan raqiblarimiz yaxshi taassurot qoldirmoqda.

«Andijon» matbuot xizmati.