Germaniyada Fisher nomidagi Freestyle Chess G.O.A.T Challenge shaxmat turnirida bugun chorak final bosqichi doirasida ikkinchi o‘yinlari o‘tkazildi.

Nodirbek Abdusattorov amaldagi shaxmat toji sohibi xitoylik Ding Lirenga qarshi kecha chorak finalning dastlabki o‘yinida ishtirok etib, g‘alaba qozongandi. Bugun esa hamyurtimiz qora donalarda o‘ynadi. Abdusattorovga bugun durang ham yetarli bo‘lardi. Nodirbek bu vazifani muammosiz uddaladi. 49-yurishdan keyin taxtada mutlaqo tenglik holati yuzaga keldi.

Natijada ikki o‘yin natijasiga ko‘ra Nodirbek Abdusattorov raqibini 1,5 - 0,5 hisobida mag‘lub etdi va yarim finalga chiqdi. Yarim finalda qatandoshimiz Alirizo Feruja (Fransiya) - Magnus Karlsen (Norvegiya) juftligi g‘olibi ro‘baro‘ keladi. Hozircha bu shaxmatchi o‘rtasidagi bahsda durang bo‘lib turibdi (1:1). G‘oliblikni aniqlash maqsadida tomonlar ikkita blis partiya o‘ynamoqda.

Yarim finalning dastlabki o‘yinlari ertaga o‘tkaziladi.

Chorak final natijalari:

Nodirbek Abdusattorov (O‘zbekiston) - Ding Liren (Xitoy) - 1-0; 0,5-0,5
Vinsent Keymer (Germaniya) - Levon Aronian (AQSH) - 0,5-0,5; 0-1
Fabiano Karuana (AQSH) - Domaradju Gukesh (Hindiston) - 1-0; 0,5-0,5
Alirizo Feruja (Fransiya) - Magnus Karlsen (Norvegiya) - 1:0, 0:1

Yarim final juftliklari
Nodirbek Abdusattorov (O‘zbekiston) - Alirizo Feruja / Magnus Karlsen
Levon Aronian (AQSH) - Fabiano Karuana (AQSH)