Sport sharhlovchisi Hasan Turdialiyev Zoir Tursunboyevning YouTube kanaliga bergan intervyusida otasi Davlat Turdialiyev, telekanaldan topadigan daromadi hamda O‘zbekiston terma jamoasidagi kamchiliklar borasida o‘z fikrlarini bildirib o‘tdi.

Sharhlovchi otasini qanday xafa qilgani haqida so‘zlagan.

“Dadam hech qachon so‘kmasdi. Kunlardan bir kuni spektakl tugagach ziyofat qildik va undan so‘ng uxlab qolibman. Yarim tunda uyg‘onib, uyga yugurganman. Uyga kelgach, otamdan so‘kish eshitganman. Bu birinchi va oxirgi eshitgan so‘kishim bo‘lgandi.

Hozir otamning sohasidaman. Ulardan juda ko‘p narsalarni so‘ragim keladi. Afsuski, otam endi oramizda yo‘q. Otam bilan birga sharhlaganman. Shukrki, bu narsa armon bo‘lmagan”, — deydi Hasan Turdialiyev.

Bundan tashqari Turdialiyev O‘zbekiston terma jamoasidagi kamchiliklarga ham to‘xtalib, murabbiylarning tez-tez almashtirilishi xato deb hisoblashini aytib o‘tgan.

“Biz bir murabbiyga ishonib, to‘liq davrni yakunlamasdan bo‘shatib yuboramiz. Masalan, hozirdanoq Katanesga iste’fo haqida savollar berildi. Bu xato deb hisoblayman. Ozgina sabr qilishimiz kerak”, — deydi Hasan.

Sharhlovchilar daromadi haqida ham odamlar turlicha fikrlar bildiradi. Hasan Turdialiyev ushbu savollarga ham javob berarkan, sharh va umumiy kasbidan topayotgan daromadini ochiqladi.

“Sharhlovchilar daromadi yashashga yetadi, ammo undan ortig‘iga emas. Bizning ikki soatlik bir o‘yinimizdagi sharh uchun 300 ming so‘m to‘lanadi. Ko‘rsatuvlar narxi bundan ham pastroq. Umumiy olganda, bir oylik daromadim 1000 dollarga yetmaydi. Mendan kamroq ko‘rsatuvlar tayyorlovchi xodimlar ancha kam pul topadi. Bu juda og‘riqli nuqtamiz”, — deydi Hasan Turdialiyev.