Qozon shahrida bo‘lib turgan O‘zbekiston delegasiyasi vakillari xizmat safari davomida qator muzokaralar olib borib, o‘zaro aloqalarni mustahkamlash yo‘lida muhim kelishuvlarga erishishdi.
Jumladan, O‘zbekiston MOQ Bosh kotibi Oybek Kasimov va O‘zbekiston fijital sport federasiyasi raisi Oleg Pekos boshchiligidagi mutasaddilar Rossiya Federasiyasi hukumat rahbarining o‘rinbosari Dmitriy Chernishenko hamda Xalqaro fijital sport federasiyasi prezidenti Rene Fazel bilan uchrashuv o‘tkazishdi.
Dmitriy Chernishenko Rossiyadan so‘ng ikkinchi bo‘lib O‘zbekistonda milliy fijital sport federasiyasining tashkil etilganini alohida ta’kidladi. O‘z navbatida, Rene Fazel Xalqaro federasiyaning rejalari va yangi loyihalari xususida ma’lumot berdi.
Shuningdek, Oleg Pekos O‘zbekiston tomoni sport olamidagi bunday yangi tashabbusni qo‘llab-quvvatlashdan mamnun ekani, bir oy ichida federasiyada ahil jamoa tuzilib, ishlar jadal boshlab yuborilgani haqida gapirdi. Oybek Kasimov yurtimizda sport infratuzilmasining kuchayib borayotganini poytaxtimizda qad rostlayotgan Olimpiya shaharchasi misolida so‘zlab berdi.
Shundan so‘ng Xalqaro va O‘zbekiston fijital sport federasiyalari o‘rtasida o‘zaro hamkorlik memorandumi imzolandi.
Qayd etish joiz, O‘zbekiston Xalqaro fijital sport federasiyasi bilan hamkorlik to‘g‘risida bitim imzolagan birinchi davlat bo‘ldi.
