Yangi mavsum startiga oz vaqt qoldi. Ortda qolgan 1 yil tahlil qilinsa, hakamlarimiz bir qator xalqaro musobaqalarda faol ishtirok etishgani ko‘rinadi.

Jumladan, Rustam Lutfullin U-17 Osiyo kubogida, Ahrol Risqullayev U-20 Osiyo kubogida, Ilgiz Tantashev esa o‘z jamoasi bilan qit’amizning eng nufuzli musobaqasi — Osiyo Kubogida ishladi. Video assistentlarimiz ham yil davomida ko‘plab xalqaro uchrashuvlarga jalb etildi. Bundan tashqari, hakamlarimiz 2023-24 yilgi Osiyo Chempionlar ligasi mavsumining guruh bosqichi har bir turida munosib ishtirok etishdi.

Ayni paytda xalqaro maydondan eng ko‘p chaqiruv olgan referi Tantashev bo‘ldi. 39 yoshli arbitrga yil davomida 13 ta uchrashuv ishonib topshirildi. Ayollar futbolida esa Edita Mirobidova bilan Roziyabonu Yusupova singari hakamlarimiz o‘zini ko‘rsatdi. Quyida 2023 yil xalqaro uchrashuvlarda eng ko‘p o‘yinlarda ishlagan 10 hakamimiz nomi keltirilgan:

— Ilgiz Tantashev: 13 o‘yin bosh hakam;
— Ahrol Risqullayev: 12 o‘yin bosh hakam;
— Rustam Lutfullin: 4 o‘yinda bosh, 10 tasida zaxira hakami;
— Firdavs Norsafarov: 3 ta o‘yinda bosh, 7 tasida VAR/AVAR hakami;
— Aziz Asimov: 5 uchrashuvda VAR/AVAR hakami;
— Rahimbek Karimov: 4 o‘yinda VAR/AVAR hakami;
— Abdurashid Xudoyberganov: 4 o‘yinda VAR/AVAR hakami;
— Nayim Qosimov: 7 uchrashuv, plyaj futboli;
— Edita Mirobidova: 3 ta o‘yinda bosh hakam;
— Roziyabonu Yusupova: 3 o‘yin, bosh hakam.