Toshkentda o‘tayotgan "katta dubulg‘a" musobaqasida -73 kg vazn toifasida qatnashgan har ikki dzyudochimiz g‘alabaga bo‘lgan ishtiyoqlarini munosib tarzda namoyish etishdi.

Shahram Ahadov poytaxtimizda o‘tayotgan turnirda bronza medalini qo‘lga kiritdi. Yurtdoshimiz uchinchi o‘rin uchun kechgan bahsda neytral atlet maqomida kurashgan Mahmadbek Mahmadbekovdan ustun kelib, beshinchi marotaba «Katta dubulg‘a» tasnifidagi musobaqaning medalini rasmiylashtirdi.

-73 kg vazn toifasida kurashgan yana bir sportchimiz Obidxon No‘monov ham bronza medaliga sazovor bo‘ldi. Qozog‘istonlik Daniyar Shamshayev bellashuvda taqiqlangan usulni qo‘llagani uchun hamyurtimiz bronza medali bilan taqdirlanadigan bo‘ldi. Shu tariqa, No‘monov va Ahadov o‘z hisoblariga jahon va Parij-2024 reytingi uchun 500 ochkoni qo‘shib qo‘yishdi.

Afsuski, bronza medali uchun bahsda jarohat olgan Obidxon No‘monov taqdirlash marosimida ishtirok eta olmadi. No‘monovning tezroq sog‘ayib, yanada kuchli bo‘lib qaytishini tilab qolamiz. G‘olib va sovrindorlarga medallarni Osiyo Olimpiya kengashi vise-prezidenti Otabek Umarov topshirdi.