«Al-Nasr»ning bosh yulduzi Krishtianu Ronaldu 2023 yilning bosh to‘purari sifatida Globe Soccer Awards laureatiga aylangan, ya’ni Diyego Maradona sharafiga atalgan sovrin sohibi bo‘lgandi.
G‘alati tomoni shundaki, 2019 yili aynan «Al-Nasr» safida marokashlik hujumchi Abdulrazzoq Hamdalla hammadan ko‘proq gol urgan, ammo sovrinsiz qolgan ekan. Nega?
Globe Soccer Awards - g‘alati taqdimot. Tushunarliki, Ronaldu 2023 yilni o‘ta kuchli o‘tkazdi: Saudiya Arabistoni chempionatiga yo‘l olgan superyulduz barqaror ravishda megasamaradorlik qayd etdi - 59ta o‘yinda 54ta gol. Krish shu tariqa Globe Soccer Awards taqdirlash marosimida yilning eng yaxshi to‘purariga atalgan sovringa ega chiqdi. Uni yana Osiyoda yilning eng yaxshi futbolchisi sifatida e’tirof etishlariga oz qoldi (ha, so‘rov shartiga ko‘ra, OFK hududida o‘ynaydigan boshqa qit’alar vakillariga ham ovoz berish mumkin). Xullas, yil yakunlari sarhisob qilinadigan va eng yaxshilar taqdirlanadigan Globe Soccer Awards marosimida portugaliyalik yulduzga 2023 yilning eng yaxshi to‘purari sifatida Diyego Maradona sharafiga atalgan maxsus mukofot topshirildi. Biroq buni hamma birdek qabul qilgani yo‘q. Xususan, arab futboli muxlislarlari kutilmaganda, ijtimoiy tarmoqlarda «Al-Nasr»da o‘ynagan yana bir legioner - marokashlik Abdulrazzoq Hamdalla natijasini eslab qolishdi. Arab matbuotida yozilishicha, u 2019 yili naq 57ta gol urgan, biroq alohida mukofot olmagan. Ma’lumot uchun, 2019 yilning rasmiy bosh to‘purari Robert Levandovski 54ta gol urgan. Xo‘sh, bu ma’lumot to‘g‘rimi? Unchalik emas.
Deylik, transfermarkt portalida keltirilishicha, Hamdalla 2019 yili 57ta esa 54ta gol urgan. Ya’ni polshalik goleador bilan teng natija ko‘rsatgan. Barchasi qayta va sinchkovlik bilan hisoblab chiqilgach, transfermarkt talqini to‘g‘ri chiqdi: darhaqiqat, Hamdalla ham, Levandovski ham yilni 54tadan gol bilan yakunlagan. Ammo marokashlik to‘purar polshalikka nisbatan naq 23ta kam o‘yin sarflagan o‘sha natija yo‘lida! Biroq uni nega yilning bosh to‘purari sifatida e’tirof etishmagani tushunarsiz holat. To‘g‘ri, Globe Soccer Awards marokashlikni 2019 yilning eng yaxshi arab futbolchisi sifatida e’tirof etgandi.
O‘zi Hamdalla kim? Marokash milliy jamoasining JCH-2022dagi kutilmagan muvaffaqiyati ishtirokchisi! Hozirda «Al-Ittihod»da to‘p surayotgan Hamdalla endi har jihatdan yangi klubdoshi Karim Benzemadan nusxa ko‘chirishi bilan ham mashhur. Deylik, u fransiyalik yulduz kabi qo‘lini bog‘lab oladi va quloqchin bilan yuradi. Umuman, Hamdalla g‘ayrioddiy faoliyat sohibidir. Barchasini o‘z vatanida boshlagan hujumchi keyin kutilmaganda, Norvegiya chempionatiga yo‘l oladi va u yerda 1 mavsum o‘ynaydi. Abdulrazzoq shundan so‘ng Osiyo mamlakatlari yo‘nalishida harakatlandi: Xitoy - Qatar - Saudiya Arabistoni. Hamdalla hozir Saudiya futbolida chin yulduz maqomida. Deylik, oxirgi 4ta mavsumda 3 marta mahalliy chempionatning bosh to‘purari bo‘ldi. Qolaversa, mavsum-2018/2019 yakunida eng yaxshi futbolchi sifatida tan olindi. «Al-Nasr» libosidagi 108ta o‘yinda 112ta gol (!) urgani va klub tarixidagi to‘purarlar ro‘yxatida 2-o‘rinda ekanligini alohida aytish kerak.
Hamdallaning Marokash termasidagi faoliyatiga kelsak, 2012 yili debyutini nishonlagan hujumchi ortda qolgan vaqt mobaynida atigi 24ta o‘yinda qatnashgan. U 2019 yili milliy jamoada boshqa o‘ynamasligini ham e’lon qilgandi. O‘shanda mahalliy OAVda hujumchining murabbiylar shtabi bilan mojaroga borgani haqida xabarlar chiqqandi. Shundan bir necha oy o‘tgach, matbuot anjumanida bosh murabbiydan Hamdallani ortga qaytishi ehtimoli yuzasidan so‘rashganida, u jimgina hujumchining «Instagram»da endi hech qachon milliy jamoa libosini kiymasligi to‘g‘risida yozgan posti nusxasini ko‘rsatdi. Darvoqe, Abdulrazzoq ushbu ijtimoiy tarmoqda 1 milliondan ko‘p obunachiga ega. Muhimi, Hamdalla Marokash termasi futbolkasini qayta kiydi. Ya’ni 3 yildan keyin, JCH-2022 arafasida jamoa tarkibiga kiritildi. Qatarda esa odatdagidek, asosan ikkinchi bo‘limda maydonga tushdi va hech qanday samarali harakatni amalga oshirmadi. Faqat Fransiya termasiga qarshi kechgan yarim final o‘yini oxirida, hisob 0:1 bo‘lib turgan pallada yaxshi vaziyatni yo‘qqa chiqargani bilan esda qoldi. Yakunda Hamdallah yil boshida o‘tkazilgan Afrika kubogi-2023dan chetda qoldi.
2022 yili «Al-Nasr»ni «Al-Ittihod»ga almashtirgan marokashlik darhol Saudiya Arabistoni chempioni bo‘ldi. Yozda jamoa safiga Karim Benzema qo‘shildi va klub Hamdalladan 9-raqamni fransiyalikka berishni so‘radi. Marokashlik bunga ko‘ndi va «99»ni oldi. «Jamoamizga kelgan har qanday futbolchini iliq qarshi olamiz. Axir biz professional futbolchilarmiz va ham tashqi, ham ichki raqobatga ko‘nikib ulgurganmiz», - degandi Hamdalla o‘sha payt. Mahalliy jurnalistlarning yozishlaricha esa, marokashlik hujumchi ilk kundanoq fransiyalik mashhur ampluadoshiga bog‘lanib qolgan. U endi har narsada Benzemaga taqlid qilmoqda: bir xil kiyim va naushnik, yurish-turish... Aytishlaricha, Abdulrazzoq oxirgi vaqtlar hattoki, Benzema sartaroshi xizmatidan foydalanmoqda. Marokashlik yana xuddi fransiyalik kabi o‘ng qo‘lini bog‘lab olishni ham odatga aylantirdi. Diqqatga sazovor jihati, Benzemaning uslubi yordam bermoqda: u joriy mavsum yangi kumiridan ancha ko‘p gol urmoqda.
Globe Soccer Awards 2010 yili Yevropa klublar va futbol agentlari assosiasiyasi tomonidan ko‘plab yirik homiylar yordamida ta’sis etilgan. Taqdirlash marosimi hamisha Dubayda bo‘ladi. Laureatlar muxlislar va mutaxassislar ishtirokidagi so‘rov vositasida aniqlanadi. Masalan, 2023 yili so‘rovga Franchesko Totti, Iker Kasilyas, Jennaro Gattuzo, Luish Figu, Antonio Konte va Fabio Kapello kabi mashhurlar taklif qilindi. Mish-mishlarga qaraganda, mukofot ta’sischilari qatorida Ronalduning sobiq agenti Xorxe Mendesh ham bor. Aytish kerak, Globe Soccer Awards talqini bo‘yicha aynan Krish hammadan ko‘p yilning eng yaxshi futbolchisi sifatida e’tirof etilgan - 6 marta. Taqqoslash uchun, Lionel Messi faqat 2015 yili g‘alaba qozongan. Shuningdek, 14 yil davomida eng yaxshi futbol agentiga topshiriladigan mukofot asosan Mendeshga berildi (12 marta). 2020 yili esa Globe Soccer Awards Ronalduni asr futbolchisi, Mendeshni asr agenti sifatida tan olgandi. To‘g‘ri, qavs ichida mukofot 2001-2020 yillar uchun topshirilgani qayd etilgan. Hamdalla 54ta gol urgan vaqt Maradona sharafiga atalgan sovrin mavjud emasdi. Bu Ronaldu uchun o‘ylab topilmagan, albatta. Zero, sovrin ilk marta 2021 yili berilgan va uni Levandovski olgan. Qiziq, 2022 yili eng yaxshi to‘purar Globe Soccer Awards tomonidan negadir taqdirlanmagandi.
M.PO‘LATOV tayyorladi
