Angliya chempionati yakunlanganidan keyin “Nyukasl” va “Tottenxem” futbolchilari ta’tilga chiqmadi. Chorshanba kuni jamoalar Avstraliyada o‘rtoqlik uchrashuvi o‘tkazishdi. "Qarg‘alar" va "shporlar" o‘rtasidagi o‘yin 1:1 hisobida durang bilan yakunlandi. Darvozabon Nik Popning uzatmasidagi qo‘pol xatodan so‘ng urilgan Jeyms Meddisonning goliga "Nyukasl" Aleksandr Isakning zarbasi bilan javob berdi. Har ikkala gol ham birinchi bo‘limda kiritildi.
Eslatib o‘tamiz, “Tottenxem” Angliya chempionatini beshinchi, “Nyukasl” esa yettinchi o‘rinda yakunlagan. “Shporlar” Yevropa Ligasiga yo‘llanma oldi va “Qarg‘alar” agar “Manchester Siti” Angliya kubogini qo‘lga kiritsa, Konferensiyalar ligasiga yo‘llanmani qo‘lga kiritadi.
