Niderlandiyalik hujumchi Vout Vegxorst «Xoffenxaym» bilan ijara shartnomasi yakunlanganidan keyin Angliyaning «Byornli» klubiga qaytadi, deya xabar beradi jurnalist Florian Plettenberg X (sobiq Twitter) ijtimoiy tarmog‘ida.

Manbaga ko‘ra, «Xoffenxaym» forvardni sotib olish bo‘yicha taklif bilan chiqmaydi, biroq klub uning o‘yinlaridan juda mamnun va ijarani muvaffaqiyatli deb hisoblaydi.

Joriy mavsumda 31 yoshli Vegxorst barcha musobaqalarda «Xoffenxaym»ning 30 ta uchrashuvida qatnashib, 7 ta gol urdi va 4 ta golli uzatmani amalga oshirdi.

Forvardning «Byornli» bilan amaldagi shartnomasi 2025 yilning yoziga qadar mo‘ljallangan. Eslatib o‘tamiz, ingliz klubi 2023/2024 yilgi mavsum yakunida Premyer-ligadan tushib ketdi va kelasi yili Chempionshipda ishtirok etadi.