"Manchester Siti" bosh murabbiyi Pep Gvardiola o‘z faoliyati davomida klub erishgan muvaffaqiyatlari haqida gapirdi.
"Siti" yaqinda Gvardiola qo‘l ostida ketma-ket to‘rtinchi va sakkiz yil ichida oltinchi marta yana Premyer-ligada g‘olib chiqdi. Shanba kuni jamoa Angliya kubogi finalida "Manchester Yunayted"ni mag‘lub etib, oltin dublga erishishi mumkin.
“Bizga Premyer-ligada omad kulib boqdi, lekin Chempionlar ligasida ko‘p marta omadsizlikka uchradik. Bu futbol, buni qabul qiling va oldinga intiling”, - deb javob berdi Gvardiola “Manchester Siti”ning final oldidan muvaffaqiyati haqidagi savolga. “Albatta, klubda uzoq yillardan buyon bitta murabbiy, bitta sport direktori, boshqaruv raisi, bosh direktor va boshqa odamlar borligi ham yordam beradi”, dedi 53 yoshli mutaxassis matbuot anjumanida.
