“Bavariya” markaziy himoyachisi Dayo Upamekano Fransiya terma jamoasi uchun o‘yinda jarohat oldi. 25 yoshli futbolchi Lyuksemburg bilan o‘rtoqlik uchrashuvida (3:0) "uch ranglilar"ning asosiy tarkibida maydonga tushdi, ammo tanaffusdayoq uni Didye Desham Uilyam Saliba bilan almashtirishga majbur bo‘ldi.
TF1 ma’lumotlariga ko‘ra, Upamekano chap sonida noqulaylik his qilgani uchun uni almashtirishni so‘ragan. Hozircha markaziy himoyachining jarohati og‘irligi ma’lum qilinmadi, yaqin orada tekshiruvlar o‘tkaziladi.
9 iyun kuni Fransiya terma jamoasi Kanada bilan o‘rtoqlik o‘yini o‘tkazadi, 17 iyun kuni esa Yevropa chempionatidagi ishtirokini Avstriya bilan o‘yinda boshlaydi.
