Ispaniya terma jamoasi hujumchisi Ferran Torres Yevro-2024 guruh bosqichi 3-tur uchrashuvidan so‘ng o‘z fikrlari bilan o‘rtoqlashdi. “Qizil furiya” 1:0 hisobida g‘alaba qozondi va Torres yagona gol muallifiga aylandi. Ispanlar 9 ochko jamg‘arib, birorta ham gol o‘tkazib yubormadilar va pley-offga 1-o‘rindan ishonch bilan kirishdi.

"Biz fenomenal o‘ynayapmiz. Biz bir oilamiz, juda do‘stona. Bu jamoaning o‘ziga xos tomoni shundaki, hamma asosiy tarkibda maydonga chiqishga tayyor. Zaxiradan maydonga tushgan futbolchilar ham juda muhim, chunki o‘yinlar oxirida ko‘plab gollar kiritiladi. Murabbiyga jamoa haqida qaror qabul qilish qiyin bo‘lishini istayman.

Ispaniya libosini kiysam, o‘zimni hamma uchun, oilam va meni qo‘llab-quvvatlayotganlar uchun o‘ynagandek his qilaman. Men bu libosni kiyganimdan faxrlanaman", - dedi Torres UYEFA saytiga.