Milan Shkrinyar Yevro-2024ning 1/8 finalida Slovakiyaning Angliyaga qarshi mag‘lubiyati (qo‘shimcha vaqt 1:2) haqida fikr bildirdi.

Inglizlar asosiy vaqtda 95-daqiqada Jud Bellingemning goli evaziga hisobni tenglashtirishdi.

"So‘z topish qiyin, barchamiz juda xafamiz. Keyingi bosqichga juda yaqin qolgandik. Agar biz Slovakiyani shu tariqa himoya qilishda davom etsak, balki oldinda bundanda ham yaxshi kunlar kutib turibdi. Angliyada sifatli o‘yinchilar bor va ular bizga bosim o‘tkazishdi, keyin birdan Bellingem gol urdi.

So‘nggi daqiqada gol o‘tkazib yuborganimiz juda achinarli. G‘alabaga 30 soniya qolgan bo‘lsa kerak. Lekin men butun jamoa bilan faxrlanaman. Bu ajoyib ijro. Muxlislarga ham rahmat aytmoqchiman.

Biz Slovakiya terma jamoasi tarixini qayta yozishga tayyor edik, ammo, afsuski, hammasi boshqacha ketdi. Umid qilamanki, bugundan keyin yanada kuchliroq qaytamiz", - dedi Slovakiya sardori.