Myunxenning "Bavariya" klubi himoyachisi Kim Min Chje Italiya chempionatiga qaytishi mumkin. La Gazzetta dello Sport xabariga ko‘ra, 27 yoshli futbolchining xizmatlariga "Inter" qiziqish bildirmoqda. Qayd etilishicha, milan klubi janubiy koreyalik futbolchini ijaraga olmoqchi.
Kim Min Chje o‘tgan yozdan beri nemis klubida to‘p tepmoqda, bungacha u "Napoli"da o‘ynagan. O‘tgan mavsumda himoyachi "Bavariya" safida barcha turnirlar doirasida 36 ta o‘yinda qatnashib, bitta gol urdi va jamoadoshlariga ikkita golli uzatma berdi.
Futbolchining klub bilan shartnomasi 2028 yilgacha mo‘ljallangan va futbolchining transfer qiymati 45 million yevroga baholanmoqda.