Mamlakat milliy chempionati – Superliga-2024 musobaqasining birinchi davra bahslari "Metallurg" jamoasi uchun muvaffaqiyatli kechdi, deb ayta olmaymiz. Jamoa 13 ta o‘yinning yarmidan ko‘prog‘i – 7 tasida raqiblar bilan ochkolarni bo‘lib oldi. 6 ta bahsda esa imkoniyatni boy berdi. Kiritilgan va o‘tkazib yuborilgan to‘plar farqi ham manfiy – 10:18.

Murabbiylar shtabi birinchi davraning 13 bahsida 21 nafar futbolchining xizmatidan foydalandi – 2 nafar darvozabon, 9 nafar himoyachi, 6 nafar yarim himoyachi va 4 nafar hujumchi.

Birinchi davrada "Metallurg"ning 6 nafar futbolchisi barcha 13 ta uchrashuvda maydonga tushishdi. Bular - Abrorbek Toshqo‘ziyev, Shahzodbek G‘ofurbekov, Ivan Yosovich, Sardor Abduraimov, Iskandar Shayqulov hamda Daler Sharipovlardir. Mirg‘iyos Sulaymonov, Ergash Ismoilov hamda Behruz Abdullayevlar esa faqtgina bittadan o‘yinda to‘p surishdi. O‘yinchilarning maydonda bo‘lishini daqiqalar misolida tahlil etadigan bo‘lsak, eng ko‘p o‘yin vaqti Abrorbek Toshqo‘ziyevda – 1126 daqiqa.

Jamoaning yetti nafar o‘yinchisi raqib darvozasiga gol kiritishni uddaladi. Ulardan yarim himoyachi Marko Milichkovich, hujumchilar Daler Sharipov va Shahzodbek Ubaydullayevlar 2 tadan gol mualliflari bo‘lishdi.

O‘yinlarni boshqarib borgan hakamlar "Metallurg"ning 13 nafar a’zosiga sariq kartochka ko‘rsatdi. Eng ko‘p ogohlantirilganlar – Rizo Yazdando‘st, Abrorbek Toshqo‘ziyev, Shahzodbek G‘ofurbekov, Ivan Yosovich, Iskandar Shayqulov hamda Daler Sharipovlardir. Mazkur futbolchilarimizda 3 tadan sariq kartochka bor. Abror Toshqo‘ziyev ogohlantirishlarining 2 tasini bitta o‘yinda olib, maydondan chetlatilgan. Iskandar Shayqulov esa davraning oxirgi uchrashuvda to‘g‘ridan to‘g‘ri qizil kartochka oldi.

Quyida "Metallurg" futbolchilarining birinchi davradagi statistik ma’lumotlari e’tiboringizga havola etilmoqda. Batafsil tanishib, o‘zingiz xulosa chiqaring.