Ispaniya terma jamoasi hujumchisi Alvaro Morata Yevropa chempionatidagi g‘alabadan keyin jarohat olgan yarim himoyachi Gaviga murojaat qildi.

Dushanba kuni ispanlar bir kun avval Angliya bilan finalda (2:1) qo‘lga kiritgan g‘alabasini muxlislari bilan nishonlashdi. “Qizil furiya” sardori Morata o‘z nutqini gapirar ekan, kuzda olgan og‘ir jarohati sabab turnirni o‘tkazib yuborgan Gavini ham eslatib o‘tishni unutmadi.

“Bu g‘alaba, jumladan, sizning yordamingiz bilan bo‘ldi. Rahmat, Gavi. Siz jamoaning muhim qismi bo‘lib qolasiz. Xarakteringiz tufayli jang qilishimizga yordam berdingiz. Siz Ispaniya terma jamoasining kelajagisiz, bunga hech qanday shubha yo‘q”, - dedi Morata.