Himoyachi Murilyo yana bir mavsumni "Nottingem Forest"ga bag‘ishlashni rejalashtirayotganini aytdi.

"Nottingem Forest" bir yil avval Murilyoni "Korintians"dan 10 million funtga sotib olgandi. 22 yoshli braziliyalik futbolchi Premyer-ligaga a’lo darajada moslashdi va o‘tgan mavsum yakunida "o‘rmonchilar"ning eng yaxshi futbolchisi deb topildi.

60 million funt sterlingga baholanayotgan Murilyo yoz boshida "Chelsi", "Tottenxem" va "Atletiko Madrid" kabi yirik klublar qiziqishiga sabab bo‘lgan edi, ammo himoyachi "Nottingem Forest"da qolishni rejalashtirmoqda.

"Menga muntazam o‘yin vaqti kerak va men o‘ylaymanki, "Forest" mening faoliyatim uchun eng yaxshi joy.

Bu yerda yana bir mavsum qolish menga o‘yinchi sifatida yetuklikka erishishga imkon beradi va yakunda agar bir kun boshqa saviyada o‘ynash imkoniga ega bo‘lsam, yaxshiroq tayyorlanaman.

Albatta, men Chempionlar ligasida o‘ynashni xohlayman. Men bolaligimda video o‘yinlar o‘ynaganman va bu jamoalarning barchasida o‘ynaganman.

Men Chempionlar Ligasi madhiyasini o‘yinlardan oldin eshitganimda, bu meni hayajonga solardi va bu musobaqada o‘ynash men uchun orzu bo‘lardi.

Ammo men bu yerdagi ishimga 100 foiz e’tiborimni qaratganman va men shunchaki bo‘lishim mumkin bo‘lgan eng zo‘r bo‘lishni xohlayman. "Forest" - o‘ziga xos tarzda ulkan klub va o‘zimni bu yerda yaxshi his qilaman" - dedi Murilyo The Telegraph nashriga.