Madridning “Atletiko” klubi hujumchisi Joau Feliks transfer davri tugaguniga qadar “Barselona”ga qaytishi mumkin.
O‘tgan yili "blaugrana" yozgi transfer oynasining so‘nggi soatlarida portugaliyalikni ijaraga olgandi - bu safar ham xuddi shunday bo‘lishi mumkin. Sport xabariga ko‘ra, agar "Barselona" Feliksni qaytara olsa, bu bir yil oldingi kabi so‘nggi daqiqada sodir bo‘ladi. Ungacha Kataloniya klubi boshqa nomzodlar bo‘yicha ham kelishuvga erishishga harakat qiladi.
24 yoshli futbolchining "Barselona"ga o‘tishi mumkin bo‘lgan transfer tafsilotlari noma’lumligicha qolmoqda. Moliyaviy qiyinchiliklar tufayli to‘liq transferni amalga oshirish qiyin bo‘ladi va qayta ijaraga olish varianti, turli manbalar bir necha bor xabar qilganidek, "Atletiko"ga mos kelmaydi.
