"Manchester Siti" bosh murabbiyi Pep Gvardiola "Real" hujumchisi Rodrigoni o‘z jamoasida ko‘rishni juda xohlamoqda. Marca nashrining xabariga ko‘ra, braziliyalik futbolchining transferi oyna yopilgunga qadar amalga oshishi mumkin.
Manbaning ta’kidlashicha, hammasi hali "Real"dan ketish istagini bildirmagan futbolchining xohishiga bog‘liq bo‘ladi. Avvalroq Rodrigo Kilian Mbappe transferidan so‘ng uning o‘yin amaliyoti keskin qisqarib ketishidan qo‘rqqan edi.
Ispaniya chempionatining so‘nggi mavsumida Rodrigo 10 ta gol urdi va 5 ta golli uzatmani amalga oshirdi. 23 yoshli hujumchi “Real” bilan ikki marta Chempionlar ligasida g‘olib chiqqan.
