"Inter" hujumchisi Lautaro Martines klub bilan shartnomasini uzaytirganidan so‘ng intervyu berdi. Dushanba kuni “neradzurri” argentinalik futbolchi bilan yangi mehnat shartnomasi tuzilganini e’lon qildi. Shartnoma 2029 yilning yoziga qadar amal qiladi.
"Bu men uchun juda katta ahamiyatga ega, men faxrlanaman va minnatdorman. Men kurashda va g‘alaba qozonishda davom etmoqchiman, har bir o‘yinda 100% o‘zimni berib, to‘g‘ri o‘rnak ko‘rsatib, jamoadoshlarimga yordam bermoqchiman.
“Inter” libosida ko‘p gol urganimdan juda xursandman, lekin bundan ham ko‘proq gol urish niyatim bor. Biz so‘nggi bir necha yil ichida ko‘plab sovrinlarni qo‘lga kiritdik va ikkinchi yulduzni qo‘lga kiritish bizni ayniqsa g‘ururlantiradi. Bizni har daqiqada qo‘llab-quvvatlayotgan muxlislarga alohida rahmat", - deya Lautaro Martinesning so‘zlarini keltiradi Football Italia.
