Uzoq yillar davomida iqtidorli sportchilarni tayyorlagan, hakamlik va nazoratchilik faoliyati bilan o‘zbek futboli rivojiga xissa qo‘shgan SAYFIDDIN IRMATOVning vafoti munosabati bilan marhumning yaqinlari hamda oilasiga ta’ziya bildiramiz.

Ma’lumot uchun, Sayfiddin Gaziyevich Irmatov 1953 yil 22 fevral kuni Toshkentda tavallud topgan. Bolaligidan futbolga mehr qo‘yib, millionlar o‘yini bilan shug‘ullanib kelgan. Jumladan, yoshlik davrlarida “Paxtakor”, “Spartak” va “Avtomobilchi” jamoalarida to‘p surgan. Shundan so‘ng Sayfiddin Gaziyevich “Paxtakor” bolalar-o‘smirlar sport maktabi va xalq orasida “Chig‘atoy” nomi bilan mashhur bo‘lgan futbol bo‘yicha Respublika Oliy sport mahorati maktabida yoshlarga futboldan saboq bergan. Keyinchalik futbol hakami va inspektori sifatida samarali mehnat qilgan.

Sayfiddin Irmatov faoliyati davomida ko‘plab iste’dodli yosh hakamlarni tarbiyalashda katta hissa qo‘shgan. Shogirdlari orasida FIFA referisi, futbol mundiallarini boshqarish bo‘yicha jahonning mutlaq rekordchisi Ravshan Irmatov, shuningdek, Abduhamidullo Rasulov kabi taniqli hakamlarni uchratish mumkin. Shuningdek, tarkibida Server Jeparov, Shuhrat Mirxoldirshoyev, Yaroslav Krushelniskiy, Yuriy Nikitov kabi iqtidorlarni jamlagan 1982 yilda tug‘ilgan futbolchilardan iborat O‘zbekiston o‘smirlar terma jamoasi bosh murabbiyi bo‘lgan.

O‘tganlarning oxirati obod bo‘lsin!