Ilkay Gyundogan Germaniya terma jamoasidagi faoliyatini yakunlaganini ma’lum qildi.

"Barselona" yarim himoyachisi o‘z murojaatida bu qaror haqida bir necha haftadan beri o‘ylab yurganini ta’kidladi.

"O‘z vatanim uchun 82 o‘yin o‘tkazganimni katta faxr bilan tilga olaman, 2011-yilda debyut qilganimda bu ko‘rsatkichni hech qachon orzu qilmagan edim.

Albatta, men uchun eng muhimi bu yozgi Yevropa chempionatida jamoa sardori bo‘lish sharafi bo‘ldi! Oradan shuncha yil o‘tib, nihoyat, xalqim bilan yana faxr-iftixor tuyg‘usini tuyishga muvaffaq bo‘ldim, bundan juda xursandman.

Ammo turnir boshlanishidan oldin nafaqat tanamda, balki boshimda ham qandaydir charchoq hissi paydo bo‘ldi, bu meni o‘ylantirdi", - deya ta’kidladi 33 yoshli futbolchi.