O‘rta vazn toifasida sobiq vaqtinchalik WBC chempioni Sergey Bogachuk Isroil Madrimov hamda Terens Krouford o‘rtasidagi jangga o‘z munosabatini bildirdi.

Ukrainalik bokschi P4R reytingi yetakchisi — amerikalik Terens Kroufordni 4 avgust tongida bo‘lib o‘tgan jangda mag‘lubiyatga uchragandi deb hisoblamoqda.   

“Aytyapman-ku, hakamlar Terensning g‘alabasiga ortiqcha baho berib yubordi. Ha, konkret yuqori baho berildi. Vaholanki, u Madrimovga qarshi jangda amalda hech narsa qila olmadi. Shaxsan men bu jangda Isroil Madrimov g‘alaba qozondi, deb bemalol ayta olaman.

U Krouford aslida kim va qanday darajadagi bokschi ekanini ko‘rsatib qo‘ydi. Terens taktikasi yo‘q, faqat oldinga boraveradigan meksikaliklarga qarshi janglarda yengil g‘alabalarni qo‘lga kiritib o‘rganib qolibdi. Madrimov esa umuman boshqa boks maktabini ko‘rsatib berdi. Oyoq harakatlari, raqibni yoniga chaqirib, kutilmagan xujumlar uyushtirish, doimiy jeb zarbalarini yo‘llashi, Terens bu narsalarni kutmagandi.

Agar Krouford shu jangini namoyish etsa, Saul Alvares uni shunchaki o‘ldirib qo‘yadi”, — deydi Bogachuk.

Eslatib o‘tamiz, Madrimovning Terens Kroufordga qarshi jangi 4 avgust kuni Los-Anjelesda bo‘lib o‘tgandi. Jang amerikalik bokschining ochkolar hisobiga (115-113, 115-113, 116-112) ko‘ra g‘alabasi bilan yakunlangan edi.