Mashhur fransuz sobiq futbolchisi Vilyam Gallas “Manchester Yunayted” uchun kimni ideal murabbiy deb bilishini aytdi. “Qizil iblislar” mavsumni yaxshi boshlashmadi, Premyer-liganing dastlabki uch turida bor-yo‘g‘i uch ochko jamg‘arishdi. Matbuotda Erik ten Xagning ishdan bo‘shatilishi mumkinligi haqida gap-so‘zlar ko‘paymoqda.
"Tomas Tuxel "Manchester Yunayted" muammolarini hal qila olardi", - deydi Gallas. "Agar u tayinlanganida va o‘z jamoasini qurish uchun ikki yil berilganida, "Yunayted"ning mavqei hozirgidan ancha yaxshi bo‘lardi.
"Chelsi"da Tuxel juda tartibli edi va futbolchilar uni hurmat qilishardi. U Chempionlar Ligasi va boshqa sovrinlarni qo‘lga kiritdi. Balki o‘shanda unga vaziyatni o‘zgartirish uchun yetarlicha vaqt berilmagandir", - deya "Chelsi", "Arsenal" va "Tottenxem"dagi o‘yinlari bilan tanilgan fransiyalik futbolchining so‘zlarini keltiradi Goal.
