Joriy yilning 28 sentyabr sanasida Superliga 2024 yilgi mavsumning 20-turi yakuniga yetdi. Shuningdek, 24 sentyabr sanasida Pro ligada 21-tur nihoyasiga yetdi. O‘zbekiston futbol hakamlari markazi mazkur uchrashuvlar tugagach, Ekspert-hakamlar komissiyasining navbatdagi yig‘ilishini o‘tkazdi va tur doirasida kuzatilgan bahsli vaziyatlar tahlil qilindi. Bu bellashuvlarda Superligada jami oltita, Pro ligada esa bitta bahsli vaziyat yuzaga keldi.
Quyida ularning batafsil izohi va chiqarilgan yakuniy qarorlar bilan tanishishingiz mumkin:
1-vaziyat. Pro liga, «Do‘stlik» - «Mash’al» bahsi: bahsli penalti.
«Do‘stlik» - «Mash’al» uchrashuvining 90+4-daqiqasida mezbonlarning 17-raqamli a’zosi raqib jarima maydoniga yorib kirdi va himoyachi tomonidan to‘xtatib qolindi. Bosh hakam Rustam Choriyev bu vaziyatda bahsni davom ettirdi.
Ekspert-hakamlar komissiyasi qarori: Mazkur holatda futbolchiga nisbatan qo‘pollik ishlatilgan. Himoyachi to‘pga emas, raqibining oyog‘iga o‘ynagan. Bu kabi hollarda penalti belgilanishi lozim. Ekspert-hakamlar komissiyasi hakamning qarorini noto‘g‘ri, deb hisoblaydi.
2-vaziyat. «Andijon» - «Neftchi» qarama-qarshiligi: bahsli 11 metrlik jarima zarbasi.
«Andijon» - «Neftchi» uchrashuvining 35-daqiqasida mezbonlar qulay vaziyatga ega bo‘ldi. Mazkur holatda to‘p dastlab mehmonlarning 99-raqamli vakilining son qismidan 55-raqamli futbolchining qo‘liga borib tegdi va maydonga qaytdi. Bosh hakam Nayim Qosimov vaziyat penalti uchun yetarli emasligini qayd etdi va bahsni davom ettirdi.
Ekspert-hakamlar komissiyasi qarori: Bu vaziyatda VAR holatga aralashmasdan to‘g‘ri qilgan. To‘p futbolchining jamoadoshining son qismidan kelgan. Qolaversa, qo‘l tabiiy va tanaga yopishgan tarzda turibdi. Bu kabi hollarda 11 metrlik jarima zarbasi belgilanmaydi. Shu tufayli, Ekspert-hakamlar komissiyasi tomonidan hakamlarning qarori to‘g‘ri, deb topildi.
3-vaziyat. «Dinamo» - «Surxon» qarama-qarshiligi: bahsli qizil kartochka.
«Dinamo» - «Surxon» uchrashuvining 44-daqiqasida mehmonlarning 7-raqamli futbolchisi samarqandliklarning 10-raqamli a’zosiga qarshi qo‘pol harakat qildi. Bosh hakam Ahrol Risqullayev dastlab futbolchiga sariq kartochka ko‘rsatdi. VAR hakami uni monitor yoniga chaqirgach esa referi qarorni qizil kartochkaga o‘zgartirdi.
Ekspert-hakamlar komissiyasi qarori: Bu vaziyatda VAR holatga to‘g‘ri aralashgan. Futbolchi butsasining tag qismi bilan raqib oyog‘ining himoyalanmagan qismiga zarba berdi. Ekspert-hakamlar komissiyasi hakamlarning qarorini to‘g‘ri, deb topdi.
4-vaziyat: «Dinamo» - «Surxon» o‘yini: bahsli penalti.
«Dinamo» - «Surxon» uchrashuvining 90+4-daqiqasida mezbonlarning 10-raqamli a’zosi raqib jarima maydoniga yorib kirdi, so‘ng himoyachilar tomonidan zararsizlantirildi. Bosh hakam Ahrol Risqullayev bu vaziyatda penalti yo‘qligini qayd etdi va bahsni davom ettirdi.
Ekspert-hakamlar komissiyasi qarori: Bu vaziyatda VAR holatga aralashmasdan to‘g‘ri qilgan, himoyachi raqibga nisbatan qo‘pollik ishlatmagan. U raqibiga qarshilik ko‘rsatgan, ammo bu muvozanat yo‘qotish uchun yetarli emas. Penalti belgilash uchun asos yo‘q. Komissiya hakamlarning qarori to‘g‘ri ekanini ma’lum qiladi.
5-vaziyat. OKMK - «Lokomotiv» qarama-qarshiligi: bahsli qizil kartochka.
OKMK - «Lokomotiv» uchrashuvining 90+4-daqiqasida mezbonlarning 18-raqamli futbolchisi toshkentliklarning 6-raqamli a’zosiga nisbatan qo‘pol harakat qildi. Bosh hakam Doston Mirzarayimov dastlab futbolchiga sariq kartochka ko‘rsatdi. VAR hakami uni monitor yoniga chaqirgach esa referi qarorni qizil kartochkaga o‘zgartirdi.
Ekspert-hakamlar komissiyasi qarori: Bu vaziyatda VAR holatga to‘g‘ri aralashgan. Futbolchi butsasining tag qismi bilan raqib oyog‘ining himoyalanmagan qismiga zarba berdi. Ekspert-hakamlar komissiyasi hakamlarning qarorini to‘g‘ri, deb topdi.
6-vaziyat. OKMK - «Lokomotiv» to‘qnashuvi: mehmonlarning goli.
OKMK - «Lokomotiv» uchrashuvining 90+7-daqiqasida mehmonlar gol urishga muvaffaq bo‘ldi. Biroq bosh hakam Doston Mirzarayimov monitor orqali holatni o‘rgangach, fol qayd etilganini ma’lum qildi va golni inobatga olmadi.
Ekspert-hakamlar komissiyasi qarori: Bu vaziyatda VAR holatga aralashib, to‘g‘ri qilgan. Mehmonlarning 4-raqamli futbolchisi o‘zaro kurashdan so‘ng jamoadosh darvozaboni bilan himoyachiga qo‘pol tarzda harakat qildi. Ekspert-hakamlar komissiyasi tomonidan hakamlarning qarori to‘g‘ri, deb topildi.
7-vaziyat. «Bunyodkor» - «Nasaf» qarama-qarshiligi: bahsli 11 metrlik jarima zarbasi.
«Bunyodkor» - «Nasaf» uchrashuvining 58-daqiqasida mehmonlar qulay vaziyatga ega bo‘ldi va shu holatda to‘p mezbonlarning 6-raqamli futbolchisiga tegib, o‘yinga qaytdi. Bosh hakam Olim To‘ychiboyev monitor yoniga borib, holatni o‘rganganidan so‘ng to‘p qo‘lga tekkanini qayd etdi va nuqtaga ishora qildi.
Ekspert-hakamlar komissiyasi qarori: Bu vaziyatda VAR holatga aralashib, to‘g‘ri qilgan. Qo‘l tabiiy tarzda turgani yo‘q va zarba berilgandan so‘ng to‘pga nisbatan harakat bo‘lgan. Shu tufayli, Ekspert-hakamlar komissiyasi tomonidan hakamlarning qarori to‘g‘ri, deb topildi.
