"Manchester Yunayted" himoyachisi Nussair Mazraui yuragidan kichik jarrohlik amaliyotini o‘tkazdi va endi bir necha haftaga safdan chiqdi.
"Manchester Yunayted" ikki oy oldin Mazrauni "Bavariya"dan 17,1 million funtga sotib olgandi. Nussair darhol o‘zini Erik Ten Xag jamoasining asosiy o‘yinchisi sifatida ko‘rsatdi.
Mazraui joriy mavsumda Premyer-liga va Yevropa ligasidagi "Manchester Yunayted"ning har bir o‘yinini boshladi, ammo "qizil iblislar" keyingi bir necha hafta davomida 26 yoshli marokashlik futbolchisiz qolishadi.
Sky Sports nashri xabariga ko‘ra, Mazraui yurak ritmining buzilishi aniqlanganidan keyin kichik jarrohlik amaliyotini o‘tkazgan.
"Bu juda keng tarqalgan holat va Nussair to‘liq tuzalib, bir necha hafta ichida o‘ynashga tayyor bo‘lishi kutilmoqda", - deyiladi "Manchester Yunayted" bayonotida.
Qo‘shimcha qilamizki, Mazraui xalqaro tanaffus oldidan "Aston Villa"ga qarshi o‘yinning tanaffusida almashtirilgan Garri Maguayr, shuningdek, Leni Yoro, Lyuk Shok va Tirell Malasia bilan birga shifoxonada bo‘ladi.
